ഒറ്റമുറിയിൽ താമസിക്കേണ്ടി വന്നാലും ഓക്കെയെന്ന് സരിത പറഞ്ഞു, ആ നിർണ്ണായക തീരുമാനത്തെ കുറിച്ച് മാധവൻ

ജോഡി ബ്രേക്കേഴ്സ് എന്ന ബോളിവുഡ് ചിത്രം വലിയ പരാജയമായിരുന്നു. അതിനു മുൻപ് ചെയ്തതും നന്നായില്ല. അതോടെ സിനിമ ബോറടിച്ചു. 2012 ൽ ‘വേട്ട'യുടെ ചിത്രീകരണ സമയത്ത് കാൽമുട്ടിന് പരുക്കേറ്റിരുന്നു. വേദന കലശലായതോടെ വിശ്രമം മാത്രമായി പോംവഴി. അതാണ് പറ്റിയ സമയം എന്നു തോന്നി. സരിതയോട് കാര്യം പറഞ്ഞപ്പോൾ, ‘നിന്റെ മനസ്സ് പറയുന്നത് ചെയ്യൂ...' എന്നായിരുന്നു മറുപടി. ‘സിനിമ ഇല്ലാതെ പഴയ ആ ഒറ്റമുറി അപ്പാർട്മെന്റിൽ താമസിക്കേണ്ടി വന്നാലും ഓകെ...' എന്ന് അവൾ പറഞ്ഞതോടെ തീരുമാനം എളുപ്പമായി. അങ്ങനെ ചിക്കാഗോയിലേക്ക് താമസം മാറ്റി.

പുതിയ തലമുറയിലെ സിനിമാ പ്രേക്ഷകരെ പഠിക്കാനാണ് ആ സമയം വിനിയോഗിച്ചത്. വർക്ക് ഔട്ടിനും പ്രാധാന്യം കൊടുത്തു. ശരീരം മാത്രമല്ല മനസ്സുകൊണ്ടും കുറേ മാറ്റം സംഭവിച്ചു. ഒരു സമയം ഒരു സിനിമ എന്ന തീരുമാനവും അന്നെടുത്തു. ഇടയ്ക്ക് ഹോളിവുഡ് അനിമേഷൻ സിനിമയിൽ ശബ്ദ സാന്നിധ്യമായി. മടങ്ങിവരവിൽ ചെയ്ത ‘തനു വെഡ്സ് മനു റിട്ടേൺസ്' വിജയമായി. പിന്നാലെ ഞാൻ തന്നെ നിർമിച്ച ‘ഇരുദി സുട്രു' കരിയറിലെ മികച്ച പ്രോജക്ടുമായി. മുൻപാണെങ്കിൽ ചിലപ്പോൾ അത്രയ്ക്ക് നായികാ കേന്ദ്രീകൃത കഥയിൽ അഭിനയിക്കില്ലായിരുന്നു. ‘ഇരുദി സുട്രു'വിന്റെ ഹിന്ദിയിലെ തിരക്കഥാ രചനയിലും പങ്കാളിയായി. പിന്നീട് ‘വിക്രം വേദ' കൂടി ഹിറ്റായപ്പോൾ ബോണസായി-മാധവൻ വനിതയോട് പറഞ്ഞു.

ബോളിവുഡ് സീരിയലുകളിലും പരസ്യത്തിലും സജീവമായിരുന്ന മാധവൻ 2000 ൽ പുറത്തിറങ്ങിയ അലൈപായുതെ എന്ന ചിത്രത്തിലൂടെയാണ് വെള്ളിത്തിരയിൽ എത്തുന്നത്. ആദ്യ ചിത്രം തന്നെ മാധവന്റെ കരിയർ മാറ്റി മറിക്കുകയായിരുന്നു. മണിരത്നം സംവിധാനം ചെയ്ത ചിത്രം ഇന്നും പ്രേക്ഷകരുടെ ഇടയിൽ ചർച്ച വിഷയമാണ്. മാധവന്റെ ആദ്യ നായികയായി എത്തിയത് നടി ശാലിനിയായിരുന്നു. മണിരത്നം സിനിമയിൽ സജീവമായിരുന്നു മാധവൻ. . കണ്ണത്തിൽ മുത്തമിട്ടാൽ ,ആയുത എഴുത്ത് തുടങ്ങിയ ചിത്രങ്ങളിലും മാധവൻ പ്രധാന വേഷത്തിലെത്തിയിരുന്നു. താരത്തിന്റെ ബോളിവുഡ് എൻട്രിക്ക് കാരണവും മണിരത്നം ചിത്രങ്ങളായിരുന്നു.

Recommended Video

നമ്പി നാരായണന്റെ ജീവിതകഥയുമായി മാധവന്‍! | Filmibeat Malayalam

പ്രഖ്യാപനം മുതൽ പ്രേക്ഷകർ ആകാംക്ഷയോടെ കാത്തിരിക്കുന്ന മാധവൻ ചിത്രമാണ് റോക്കട്രി-ദ് നമ്പി എഫക്ട്. നമ്പി നാരായണന്റെ ജീവിതത്തെ ആസ്പദമാക്കിയാണ് ചിത്രം ഒരുങ്ങുന്നത്. ദേശീയ പുരസ്‌കാര ജേതാവായ ആനന്ദ് മഹാദേവനും മാധവനും ചേര്‍ന്നാണ് ചിത്രം സംവിധാനം ചെയ്യാൻ തീരുമാനിച്ചത്. എന്നാൽ ഈ ചിത്രത്തിൽ നിന്ന് ആനന്ദ് പിന്മാറുകയായിരുന്നു. നടന്റെ ആദ്യ സംവിധാന സംരംഭമായ ചിത്രത്തിൽ നമ്പി നാരായണനായി എത്തുന്നത് മാധവൻ തന്നെയാണ്. ചിത്രത്തിലെ ലുക്ക് വലിയ ചർച്ചയായിരുന്നു.
തമിഴ്, ഹിന്ദി, തെലുങ്ക് ഭാഷകളിലായിട്ടാണ് ചിത്രം പുറത്തിറങ്ങുന്നത്.