മൂന്നാമതൊരു കുഞ്ഞിന് കൂടി ജന്മം നല്‍കി താരദമ്പതിമാര്‍; കുഞ്ഞിന്റെ പേര് വെളിപ്പെടുത്തി താരകുടുംബം

ഏറ്റുവമൊടുവില്‍ കുഞ്ഞതിഥി പിറന്ന സന്തോഷമാണ് സെൽവരാഘവനും ഗീതാഞ്ജലിയും പങ്കുവെച്ചിരിക്കുന്നത്. മൂന്നാമത് ഒരു ആണ്‍കുഞ്ഞിനാണ് താരപത്നി ജന്മം നല്‍കിയത്. മകന്റെ പേരടക്കം വെളിപ്പെടുത്തി കൊണ്ടാണ് താരകുടുംബം എത്തിയിരിക്കുന്നത്. റിഷികേഷ് എന്നാണ് മകന് പേരിട്ടിരിക്കുന്നത്. സന്തോഷ വാർത്ത അറിഞ്ഞതോടെ താരകുടുംബത്തിന് ഒന്നടങ്കം ആശംസകളുമായി പ്രിയപ്പെട്ടവർ എത്തിയിരുന്നു. എല്ലാവരോടും സ്നേഹവും നന്ദിയും രേഖപ്പെടുത്തിയിരിക്കുകയാണ് താരജോഡികൾ.

'സന്തോഷം നിറഞ്ഞ ഹൃദയത്തോടെ റിഷികേഷ് സെല്‍വരാഘവനെ ഞങ്ങള്‍ സ്വാഗതം ചെയ്യുകയാണ്. 2021 ജനുവരി ഏഴിനാണ് കുഞ്ഞിൻ്റെ ജനനമെന്ന് കൂടി പോസറ്ററിൽ സൂചിപ്പിച്ചിരുന്നു. ഞങ്ങള്‍ക്ക് ആശംസകളും അനുഗ്രഹങ്ങളും നല്‍കിയ നിങ്ങള്‍ ഓരോരുത്തരോടും വലിയൊരു നന്ദി പറയുകയാണ്. നിങ്ങള്‍ നല്‍കിയ സ്‌നേഹവും പിന്തുണയും ശരിക്കും എന്നെ സ്പര്‍ശിച്ചിരുന്നു. ഒരുപാട് സ്‌നേഹത്തോടെ ഗീതാഞ്ജലി, സെല്‍വരാഘവന്‍, ലീലാവതി, ഓംകാര്‍ എന്നുമാണ് പുതിയ പോസ്റ്റില്‍ സൂചിപ്പിച്ചിരിക്കുന്നത്.

തെന്നിന്ത്യന്‍ നടി സോണിയയുമായി ഉണ്ടായിരുന്ന ആദ്യ വിവാഹബന്ധം വേര്‍പ്പെടുത്തിയതിന് ശേഷമാണ് സെല്‍വരാഘവനും ഗീതാഞ്ജലിയും ഒന്നിക്കുന്നത്. അസോസിയേറ്റ് ഡയറക്ടറായിരുന്ന ഗീതാഞ്ജലി സെല്‍വരാഘവന്‍ സംവിധാനം ചെയ്ത സിനിമയില്‍ സഹസംവിധായികയായി പ്രവര്‍ത്തിച്ചിരുന്നു. അങ്ങനെയാണ് ഇരുവരും പരിചയത്തിലാവുന്നത്. അങ്ങനെ തുടങ്ങിയ സൗഹൃദം പ്രണയത്തിലെത്തി. ഒടുവില്‍ 2011 ജൂണ്‍ 19 ന് ഇരുവരും വിവാഹിതരാവുകയും ചെയ്തു. ലീലാവതി, ഓംകാര്‍ എന്നിങ്ങനെ മൂത്ത രണ്ട് മക്കള്‍ കൂടിയുണ്ട്. ഗീതാഞ്ജലി മൂന്നാമതും ഗര്‍ഭിണിയായതിന് ശേഷം ബേബി ഷവറിന്റെയും വീട്ടിലെ മറ്റ് ആഘോഷങ്ങള്‍ക്കിടയില്‍ നിന്നുള്ളതുമായ ചിത്രങ്ങള്‍ പുറത്ത് വന്നിരുന്നു.

കുഞ്ഞ് ജനിക്കുന്നതിന് മണിക്കൂറുകള്‍ക്ക് മുന്‍പ് ഗീതാഞ്ജലി പങ്കുവെച്ച പോസ്റ്റും ശ്രദ്ധേയമായിരുന്നു. പ്രസവത്തിനായി ആശുപത്രിയില്‍ എത്തിയതിന് ശേഷമുള്ള സെല്‍ഫി ചിത്രങ്ങളായിരുന്നു താരപത്‌നി ഇന്‍സ്റ്റാഗ്രാം പേജില്‍ പങ്കുവെച്ചത്. ബേബി കൗണ്ട് ഡൗണ്‍ തുടങ്ങി. കഴിഞ്ഞ ദിവസം ഏകദേശം ആയി. ഇനി ഏകദേശം കുറച്ച് മണിക്കൂറുകള്‍ മാത്രമേ അവശേഷിക്കുന്നുള്ളു. ജനുവരി 7 ന് വേണ്ടി ആകാംഷയോട കാത്തിരിക്കുകയാണ്. നിങ്ങളെല്ലാവരുടെയും പ്രാര്‍ഥനകള്‍ക്ക് നന്ദി എന്നുമാണ് ഗീതാഞ്ജലി എഴുതിയിരുന്നത്. ഇപ്പോൾ മകൻ ഉറങ്ങുകയാണെന്നും ആരും ഒച്ചയുണ്ടാക്കരുതെന്നും കാണിച്ച് പുത്തൻ വീഡിയോയുമായി എത്തിയിരിക്കുകയാണ് ഗീത.