നയന്‍താരയ്ക്ക് വില്ലന്‍ ബോളിവുഡ് സംവിധായകന്‍!!! ലേഡി സൂപ്പര്‍ സ്റ്റാറിന് പുതിയ വെല്ലുവിളി???

നയന്‍താര സിബിഐ ഓഫീസറായി എത്തുന്ന ഇമൈക നൊടികളില്‍ വില്ലന്‍ വേഷത്തിലെത്തുന്നത് ബോളിവുഡ് സംവിധായകനും നിര്‍മാതാവുമായ അനുരാഗ് കശ്യപാണ്. അദ്ദേഹം ആദ്യമായാണ് ഒരു തമിഴ് ചിത്രത്തില്‍ വേഷമിടുന്നത്.

നയന്‍താരയ്ക്കും അനുരാഗ് കശ്യപിനും ഒപ്പം യുവതാരം അഥര്‍വയും ചിത്രത്തില്‍ പ്രധാന വേഷത്തിലെത്തുന്നു. സീരിയല്‍ കില്ലറിന് പിന്നാലെ പോകുന്ന സിബിഐ ഓഫീസറുടെ കഥ പറയുന്ന ക്രൈം ത്രില്ലറാണ് ചിത്രം. സിബിഐ ഓഫീസര്‍ അഞ്ജലി വിശ്വനാഥന്‍ എന്നാണ് നയന്‍താരയുടെ കഥാപാത്രത്തിന്റെ പേര്.

ഡിമോണ്ട കോളനി സംവിധാനം ചെയ്ത അജയ് ജ്ഞാനമുത്തുവാണ് ഈ ക്രൈം ത്രില്ലര്‍ സംവിധാനം ചെയ്യുന്നത്. റാഷി ഖന്നയും ചിത്രത്തില്‍ വളരെ പ്രധാനപ്പെട്ട വേഷത്തിലെത്തുന്നു. ഹിപ്‌ഹോപ് തമിഴയാണ് ചിത്രത്തിന് സംഗീതമൊരുക്കിയിരിക്കുന്നത്. ആര്‍ഡി രാജശേഖരനാണ് ക്യാമറ കൈകാര്യം ചെയ്തിരിക്കുന്നത്.

ഒരു ക്രൈം ത്രില്ലറിന്റെ എല്ലാം സസ്‌പെനന്‍സും ത്രില്ലും നിലനിര്‍ത്തി ആദ്യ ട്രെയിലര്‍ പുറത്തിറങ്ങി. മികച്ച പ്രതികരണമാണ് ട്രെയിലറിന് ലഭിക്കുന്നത്. ട്രെയിലര്‍ പുറത്തിറങ്ങി രണ്ട് ദിവസത്തിനുള്ളില്‍ എട്ട് ലക്ഷത്തിലധികം ആളുകള്‍ കണ്ടുകഴിഞ്ഞു.

ഇമൈക നൊടികള്‍ക്ക് മുന്നേ നയന്‍താരയുടെ അരം തിയറ്ററിലേക്ക് എത്തും. ജില്ലാ കളക്ടറുടെ വേഷമാണ് ചിത്രത്തില്‍. വെള്ളമില്ലാതെ പ്രയാസം അനുഭവിക്കുന്ന കര്‍ഷക ഗ്രാമത്തിന് വേണ്ടി പോരാടുന്ന കളക്ടറാണ് നയന്‍താരയുടെ കഥാപാത്രം.

നായകന്റെ നിഴലായി നിന്ന് ഗാന രംഗങ്ങളില്‍ നൃത്തം ചെയ്യാനെത്തുന്ന പതിവ് നായിക സങ്കല്‍പങ്ങളില്‍ വ്യത്യസ്തമാവുകയാണ് നയന്‍താര. അടുത്തിടെ പുറത്തിറങ്ങിയ നയന്‍താര ചിത്രങ്ങളെല്ലാം നായിക കേന്ദ്രീകൃതങ്ങളായിരുന്നു. മായ, ഡോറ എന്നിവയും റിലീസിന് തയാറെടുക്കുന്ന അരം, ഇമൈക നൊടികള്‍ എന്നിവയും ഇതേ ഗണത്തിലുള്ളതാണ്.