രജനീകാന്തിന് 100 കോടിക്കടുത്ത് പ്രതിഫലം! 35 കോടി മുരുകദോസ് വാങ്ങി, ദര്‍ബാര്‍ നഷ്ടമെന്ന് വിതരണക്കാര്‍

വിഷയത്തില്‍ രജനീകാന്തിന്റെയോ സംവിധായകന്‍ ഏആര്‍ മുരുകദോസിന്റെ ഭാഗത്തുനിന്നോ ഇതുവരെ പ്രതികരണമൊന്നും ഉണ്ടായിട്ടില്ല. ദര്‍ബാര്‍ വിഷയത്തില്‍ തുറന്നടിച്ച് തമിഴ്‌നാട് ഫിലിം ഡിസ്ട്രിബ്യൂട്ടേഴ്‌സ്‌ അസോസിയേഷന്‍ പ്രസിഡണ്ട് ടി രാജേന്ദര്‍ രംഗത്തെത്തിയിരുന്നു. താരങ്ങളുടെയും സംവിധായകന്റെയും അമിത പ്രതിഫലമാണ് ചിത്രത്തിന്റെ ബജറ്റ് കൂട്ടിയതെന്ന് ടി രാജേന്ദര്‍ ആരോപിച്ചു.

ദര്‍ബാറിനായി 100കോടിക്കടുത്ത് രജനികാന്തും 30 കോടിക്കടുത്ത് സംവിധായകന്‍ എആര്‍ മുരുകദോസും വാങ്ങിയെന്നായിരുന്നു റിപ്പോര്‍ട്ടുകള്‍. നടനും നടിക്കും അമിത പ്രതിഫലം നല്‍കി വന്‍ തുകയ്ക്കാണ് ദര്‍ബാര്‍ വിതരണക്കാര്‍ ഏറ്റെടുത്തത്. ഇപ്പോള്‍ 70 കോടിക്ക് മുകളില്‍ സിനിമ നഷ്ടമുണ്ടാക്കിയതായി റിപ്പോര്‍ട്ടുകള്‍ സൂചിപ്പിക്കുന്നു.

200കോടിയോളം മുതല്‍മുടക്കിലാണ് സിനിമ നേരത്തെ നിര്‍മ്മിച്ചിരുന്നത്. ഇതില്‍ ഭൂരിഭാഗം പണവും താരങ്ങളുടെ പ്രതിഫലമാണെന്നാണ് അറിയുന്നത്. ദര്‍ബാറിന്റെ നഷ്ടം നികത്തണമെന്ന് ആവശ്യപ്പെട്ട് പ്രതിഷേധം ഉയര്‍ന്നുകൊണ്ടിരിക്കുകയാണ്. നേരത്തെ വിതരണക്കാരില്‍ നിന്നും സംരംക്ഷണം ആവശ്യപ്പെട്ട് സംവിധായകന്‍ ഏആര്‍ മുരുകദോസ് മദ്രാസ് ഹൈക്കോടതിയെ സമീപിച്ചിരുന്നു. ഇത് വിതരണക്കാരെ ചൊടിപ്പിച്ചിരുന്നു.

തമിഴിലെ പ്രമുഖ ബാനറുകളിലൊന്നായ ലൈക്ക പ്രൊഡക്ഷന്‍സാണ് ചിത്രം നിര്‍മ്മിച്ചത്. സന്തോഷ് ശിവന്‍ ഛായാഗ്രഹണം നിര്‍വ്വഹിച്ച ചിത്രത്തിന് അനിരുദ്ധ് രവിചന്ദര്‍ സംഗീതമൊരുക്കി. എ ശ്രീകര്‍ പ്രസാദായിരുന്നു എഡിറ്റിങ്. കാര്‍ത്തിക്ക് സുബ്ബരാജ് സംവിധാനം ചെയ്ത പേട്ടയുടെ വമ്പന്‍ വിജയത്തിന് പിന്നാലെയാണ് രജനി ചിത്രം എത്തിയത്.