അമ്മയുടെ വേർപാടിന് ശേഷം ജൂഹി എത്തി; ഉപ്പും മുളകും താരങ്ങളെല്ലാം വീണ്ടും ഒരുമിച്ച ദൃശ്യങ്ങൾ പുറത്ത്

ഉപ്പും മുളകും സംപ്രേഷണം നിര്‍ത്തിയിട്ട് കാലം ഏറെ ആയി. ഇനിയും പരിപാടിയുടെ മറ്റൊരു പതിപ്പ് ഉണ്ടാവുമോ എന്ന് ആഗ്രഹിച്ചിരിക്കുമ്പോള്‍ താരങ്ങളെല്ലാം ഒരുമിച്ച് കൂടിയെന്നാണ് അറിയുന്നത്. സോഷ്യല്‍ മീഡിയ പേജുകളിലൂടെ ഉപ്പും മുളകും താരങ്ങളെല്ലാം ഒരുമിച്ചെത്തിയതിന്റെ ദൃശ്യങ്ങളാണ് പ്രചരിക്കുന്നത്. ബീച്ചില്‍ നിന്നുള്ള വീഡിയോ വളരെ കുറഞ്ഞ സമയം കൊണ്ട് തന്നെ വൈറലായി. ബാലു ഷര്‍ട്ടും പാന്റുമൊക്കെ ഇട്ട് എക്‌സിക്യൂട്ടീവ് ലുക്കിലാണെങ്കില്‍ നീലു ഒരു മദാമ്മയെ പോലെ ഗൗണൊക്കെ ധരിച്ചാണ് വന്നിരിക്കുന്നത്.

അണിയറ പ്രവര്‍ത്തകരില്‍ ആരോ പകര്‍ത്തിയ വീഡിയോ വളരെ കുറഞ്ഞ സമയം കൊണ്ട് ശ്രദ്ധേയമായി. പാറുക്കുട്ടിയും ബാലുവും നീലുവും കേശുവും മുടിയനും ശിവാനിയുമെല്ലാം ദൃശ്യങ്ങളിലുണ്ട്. അതേ സമയം ലെച്ചുവായി അഭിനയിച്ചിരുന്ന ജൂഹി റുസ്തഗിയുടെ സാന്നിധ്യമാണ് ആരാധകര്‍ക്കും കൂടുതല്‍ ആവേശം നല്‍കുന്നത്. പരമ്പര ആയിരം എപ്പിസോഡ് പൂര്‍ത്തിയായതിന് പിന്നാലെ ജൂഹി റുസ്തഗി പിന്മാറിയിരുന്നു. ശേഷം ഉപ്പും മുളകിലേക്കും താരം എത്തിയിരുന്നില്ല. അങ്ങനെയിരിക്കുമ്പോഴാണ് വീണ്ടും ലെച്ചു വന്നിരിക്കുന്നത്.

അതേ സമയം ആഴ്ചകള്‍ക്ക് മുന്‍പാണ് വാഹനാപകടത്തില്‍ ജൂഹിയുടെ അമ്മ മരിച്ചത്. സഹോദരനൊപ്പം ബൈക്കില്‍ സഞ്ചരിക്കുന്നതിനിടെ ഉണ്ടായ അപകടത്തിലാണ് താരമാതാവിന് അന്ത്യം സംഭവിച്ചത്. അമ്മയെ നഷ്ടപ്പെട്ടതിന് ശേഷമുള്ള ജൂഹിയുടെ സങ്കടം ആര്‍ക്കും കണ്ട് നില്‍ക്കാനും സാധിച്ചിരുന്നില്ല. ഉപ്പും മുളകും താരങ്ങളെല്ലാം ജൂഹിയുടെ വീട്ടിലെത്തിയിരുന്നു. വലിയ സങ്കത്തില്‍ നിന്നും ഇപ്പോള്‍ നടി തിരിച്ച് വന്നതിന്റെ ആശ്വാസമാണ് ആരാധകരില്‍ ചിലര്‍ പങ്കുവെക്കുന്നത്. അതേ സമയം ഉപ്പും മുളകിന്റെയും ഭാഗമായി നടക്കുന്ന പരിപാടിയാണോ അതോ മറ്റെന്തെങ്കിലും ഷോ ആണോ എന്ന കാര്യത്തില്‍ വ്യക്തതയില്ല.

Recommended Video

ജൂഹിയെ വിളിച്ചിരുന്നു, അവളോട് എന്ത് പറയാനാണ്..പറ്റുന്നില്ല | FilmiBeat Malayalam

ഉപ്പും മുളകിനും ശേഷം എരിവും പുളിയും എന്നൊരു പരിപാടിയില്‍ ഇതേ താരങ്ങള്‍ ഒരുമിച്ചിരുന്നു. ഓണത്തിന് വേണ്ടി മറ്റൊരു ചാനല്‍ ഒരുക്കിയ ഷോ യിലാണ് ഉപ്പും മുളകും താരങ്ങള്‍ ഒരുമിച്ചത്. പരമ്പരയ്‌ക്കൊപ്പം പല താരങ്ങളും സിനിമകളിലും സജീവമായി പ്രവര്‍ത്തിക്കുകയാണ്. എന്തായാലും പ്രേക്ഷകര്‍ കാത്തിരിക്കുന്നത് പോലൊരു സന്തോഷ വാര്‍ത്ത വൈകാതെ ഉണ്ടാവുമെന്ന് പ്രതീക്ഷിക്കാം...