ബിഗ് ബോസിന് മണിക്കൂറുകള്‍ മാത്രം! അഡാറ് തീം സോംഗുമായി ലാലേട്ടന്‍, സ്റ്റീഫന്‍ ദേവസി, വിജയ് യേശുദാസ്..

ബിഗ് ബോസിന്റെ വരവ്

ബ്രീട്ടിഷ് ഷോ സെലിബ്രിറ്റി 'ബിഗ് ബ്രെദര്‍' എന്ന പ്രോഗ്രാം ആയിരുന്നു ബിഗ് ബോസിന്റെ ഉറവിടം. അതില്‍ നിന്നും പ്രചോദനം ഉള്‍കൊണ്ട് കൊണ്ടാണ് ഇന്ത്യയില്‍ ആദ്യമായി ബിഗ് ബോസ് ഹിന്ദിയില്‍ എത്തിയത്. ശില്‍പ്പ ഷെട്ടി മുതല്‍ അമിതാഭ് ബച്ചന്‍, സല്‍മാന്‍ ഖാന്‍, സഞ്ജയ് ദത്ത്, ഫറാ ഖാന്‍ എന്നിങ്ങനെ നിരവധി താരങ്ങള് ബിഗ് ബോസ് അവതാരകരായി എത്തിയിരുന്നു. ഏറെ കാലങ്ങളായി പ്രദര്‍ശനം തുടര്‍ന്ന് വരുന്ന ബിഗ് ബോസാണ് ഇന്ത്യയില്‍ ഏറ്റവുമധികം റേറ്റിംഗുള്ള പരിപാടി.

മലയാളത്തിലേക്ക് വരുന്നു..

ഏഷ്യാനെറ്റ് ചാനലിന്റെ ഇരുപത്തിയഞ്ചാം വാര്‍ഷികത്തിന്റെ ഭാഗമായിട്ടാണ് ഒരു റിയാലിറ്റി ഷോ സംഘടിപ്പിക്കാന്‍ അണിയറ പ്രവര്‍ത്തകര്‍ തീരുമാനിച്ചത്. അതായിരുന്നു ബിഗ് ബോസ്. മോഹന്‍ലാല്‍ അവതാരകനായി എത്തുന്ന ബിഗ് ബോസ് 100 ദിവസങ്ങളിലായിട്ടാണ് നടക്കുന്നത്. എന്‍ഡെമോള്‍ ഷൈന്‍ പ്രൊഡക്ഷന്‍സ് കമ്പനിയാണ് ഷോ നടത്തുന്നത്. കമ്പനി പറയുന്ന നിയമങ്ങള്‍ അനുസരിച്ചേ ഷോ നടത്താന്‍ പാടുള്ളു. ബിഗ് ബോസിന് വേണ്ടി പ്രത്യേകമായി ഒരു ബിഗ് ഹൗസ് നിര്‍മ്മിച്ചിരിക്കുകയാണ്. പൂനെയിലെ ലോണാവാലയിലാണ് ഷൂട്ടിംഗ് സെറ്റ്. തമിഴ്, തെലുങ്ക് പതിപ്പുകളുടെ ഷൂട്ടിംഗ് സെറ്റുകള്‍ അവിടെയുണ്ട്. അത് പൊളിച്ചു മാറ്റിയിട്ടില്ല. അതേ സെറ്റില്‍ തന്നെയാണ് മലയാളം പതിപ്പും ഷൂട്ട് ചെയ്യുന്നത്.

തീം സോംഗ്

മലയാളം ബിഗ് ബോസിന് അടിപൊളിയൊരു തീം സോംഗ് എത്തിയിരിക്കുകയാണ്. വിജയ് യേശുദാസ്, മോഹന്‍ലാല്‍, സ്റ്റീഫന്‍ ദേവസി, ഏഷ്യാനെറ്റ് സൗത്ത് മാനേജിംഗ് ഡയറക്ടര്‍ കെ മാധവന്‍ എന്നിവര്‍ ചേര്‍ന്നായിരുന്നു തീം സോഗ് പുറത്തെത്തിച്ചത്. സ്റ്റീഫന്‍ കംപോസ് ചെയ്യുന്ന പാട്ട് വിജയ് യേശുദാസ് ആണ് ആലപിച്ചിരിക്കുന്നത്. സന്തോഷ് വര്‍മ്മയാണ് വരികളൊരുക്കിയിരിക്കുന്നത്. ലോകത്തിന്‍ കഥയറിയാതെ എന്ന് തുടങ്ങുന്ന പാട്ട് എല്ലാവരുടെയും മനം മയക്കുമെന്ന കാര്യത്തില്‍ സംശയമില്ല.

ഞായറാഴ്ച മുതല്‍

ഈ വരുന്ന ജൂണ്‍ 24 ഞായറാഴ്ച മുതലാണ് ബിഗ് ബോസ് ആരംഭിക്കുന്നത്. പതിനാറ് മത്സരാര്‍ത്ഥികളുമായി 100 ദിവസം കേരളക്കരയില്‍ തരംഗമാവുന്നത് ബിഗ് ബോസ് ആയിരിക്കുമെന്ന കാര്യത്തില്‍ സംശയമില്ല. അതേ സമയം ബിഗ് ബോസില്‍ പങ്കെടുക്കുന്ന പതിനാറ് മത്സരാര്‍ത്ഥികള്‍ ആരൊക്കെയാണ് എന്നതിനെ കുറിച്ച് കൂടുതല്‍ വിവരങ്ങളൊന്നുമില്ല. അടുത്ത ദിവസം അക്കാര്യം പുറത്ത് വരുമെന്നുള്ള പ്രതീക്ഷയിലാണ് പ്രേക്ഷകര്‍.