ദിലീപിന്റെ നിര്‍ബന്ധം കൊണ്ട് മാത്രം ചെയ്തതാണ്; കരിയറില്‍ ബ്രേക്ക് സംഭവിച്ച സിനിമയെ കുറിച്ച് ഹരിശ്രീ അശോകന്‍

മലയാള സിനിമയില്‍ എനിക്ക് ബ്രേക്ക് കിട്ടിയ ചിത്രമാണ് പാര്‍വതി പരിണയം. ഒരു ഭിക്ഷക്കാരന്റെ വേഷമായിരുന്നു. അതൊരു വലിയ അനുഭവമാണ്. അന്ന് ഞാന്‍ ദിലീപ് ഹീറോ ആയിട്ടുള്ള കൊക്കരക്കോ എന്ന സിനിമയില്‍ അഭിനയിച്ച് കൊണ്ടിരിക്കുകയാണ്. സിനിമ മുഴുവനായും ഉള്ള വേഷമാണെനിക്ക്. അതിനിടെ പാര്‍വതി പരിണയത്തെ കുറിച്ച് കേള്‍ക്കുന്നു. ചിത്രത്തിലൊരു മൂന്ന് സീന്‍ ഉണ്ട്. ദിലീപ് വഴിയാണ് എനിക്കാ വേഷം വരുന്നത്. ചേട്ടാ ചേട്ടന്‍ അത് ചെയ്താല്‍ നന്നായിരിക്കും.

അവര് വേറെ ആരെയോ പ്ലാന്‍ ചെയ്തിട്ടുണ്ട്. ഞാന്‍ പറഞ്ഞിട്ടാണ് ചേട്ടന് ആ സീന്‍ അവര്‍ തരുന്നത് എന്നൊക്കെ ദിലീപ് പറഞ്ഞു. ഞങ്ങള്‍ ഒന്നിച്ച് അഭിനയിക്കുമ്പോഴും ദിലീപ് അങ്ങനെയാണ്. അശോകന്‍ ചേട്ടന്റെ സീനാണ്. കലക്കിക്കോണം തുടങ്ങി ഇങ്ങനെയൊക്കെ പറയുന്ന ഒരു നടനെ ഞാന്‍ കണ്ടിട്ടേയില്ല. നമ്മളെ അദ്ദേഹം പ്രമോട്ട് ചെയ്യും. പക്ഷേ പാര്‍വതി പരിണയത്തില്‍ അഭിനയിക്കാന്‍ പോകില്ലെന്ന് ഞാന്‍ പറഞ്ഞു.

കാരണം മൂന്ന് സീന്‍ അല്ലേ ഉള്ളു. അതൊന്നും ചെയ്തിട്ട് കാര്യമില്ല. ഈ ചിത്രത്തില്‍ മുഴുനീള കഥാപാത്രമാണ്. അന്നത്തെ അറിയാന്‍ പാടില്ലാത്ത തോന്നലുകളാണ് അതൊക്കെ. ഒടുവില്‍ ദിലീപിന്റെ നിര്‍ബന്ധപ്രകാരം ഞാനവിടെ ചെന്നു. വിശ്വംഭരന്‍ സാര്‍ പറഞ്ഞു, ഭിക്ഷക്കാരന്റെ വേഷമാണ് നിനക്ക്, പാവപ്പെട്ടവനാണ് എന്തെങ്കിലും തരണേ എന്നേ ഡയലോഗുള്ളു. എന്തെങ്കിലും ഡയലോഗ് കൂടി അതില്‍ പറഞ്ഞോട്ടേ എന്ന് ഞാന്‍ ചോദിച്ചു. എന്ത് വേണേലും പറഞ്ഞോളു. വന്ന് ഡബ്ബ് ചെയ്ത് തന്നാല്‍ മതിയെന്നായി അവരും.

Recommended Video

ദിലീപിനെക്കുറിച്ച് തുറന്നടിച്ച് വിനയൻ..അന്ന് സംഭവിച്ചതൊക്കെ | FilmiBeat Malayalam

അങ്ങനെ ഷോട്ട് എടുക്കുന്ന സമയത്ത് ഞങ്ങടെ പള്ളിയുടെ സൈഡില്‍ കിടക്കുന്ന ഒരാള്‍ എപ്പോഴും പറയാറുള്ള കാര്യം എന്റെ മനസിലേക്ക് വന്നു. കൈകാലുകള്‍ ഇല്ലാത്തവനാണ് ദൈവമേ, എന്തെങ്കിലും തരണേ... എന്ന് തുടങ്ങുന്ന ഡയലോഗ് ആയിരുന്നു ഹരിശ്രീ പറഞ്ഞത്. അത് കേട്ട് സെറ്റിലുണ്ടായിരുന്ന എല്ലാവരും ചിരിച്ച് ചിരിച്ച് നിലത്ത് വീണ് പോയെന്നും താരം പറയുന്നു. അങ്ങനെ ആ സീന്‍ വലുതാക്കി മൂന്നെണ്ണത്തില്‍ നിന്നും പന്ത്രണ്ട് സീനാക്കി മാറ്റി. പോസ്റ്ററില്‍ വരെ എന്റെ ഫോട്ടോ വരുന്നത് ആ സിനിമയിലാണ്. അത് അമ്പത് ദിവസം വരെ ഓടിയ ഓര്‍മ്മ എനിക്കുണ്ടെന്നും ഹരിശ്രീ അശോകന്‍ പറയുന്നു.