പ്രിയപ്പെട്ട പരമ്പരകൾ ഏതാനും ദിവസങ്ങൾ കൂടി മാത്രം, ഏപ്രിൽ ആദ്യ ആഴ്ചയോടെ സീരിയലുകൾ നിലയ്ക്കും

ഫെഡറേഷൻ ഓഫ് വെസ്റ്റൺ ഇന്ത്യൻ സിനി എംപ്ലോയീസും ഇന്ത്യൻ ഫിലിം ആൻഡ് ടെലവിഷൻ ഡയറക്ടേഴ്സ് അസോസിയേഷനും ഇന്ത്യൻ മോഷൻ പിക്ചർ പ്രൊഡ്യൂസേഴ്സ് അസോസിയേഷനുമാണ് സിനിമ, വെബ് സീരീസ്, സീരിയൽ എന്നിവയുടെ ഷൂട്ടിങ് നിർത്തിവെക്കാൻ തീരുമാനിച്ചിരുന്നത്. തുടർന്ന് മാർച്ച് 19 മുതൽ 31 വരെ സിനിമകൾ,വെബ്‌സീരീസുകൾ ,സീരിയലുകൾ തുടങ്ങിയവയുടെ ഷൂട്ടിങ് നിർത്തി വെക്കാൻ നിർദ്ദേശിച്ച് അവർ സർക്കുലർ ഇറക്കുകയും ചെയ്തിരുന്നു.

നിലവിൽ രാജ്യത്ത് ഏപ്രിൽ 14 വരെ ലോക്ക് ഡൗൺ പ്രഖ്യാപിച്ചിരിക്കുകയാണ്. അതിനാൽ തന്നെ സീരിയലുകൾ, പ്രതിദിന പരിപാടികൾ, റിയാലിറ്റി ഷോ, വെബ്‌സീരിസ്‌ തുടങ്ങിയവയുടെ ചിത്രീകരണം അനിശ്ചിതകാലത്തേക്ക് നീളും.. ഷൂട്ട് ചെയ്ത എപ്പിസോഡുകൾ തീരുന്നതോടെ ഏപ്രിൽ ആദ്യ ആഴ്ചയോടെ എല്ലാ ചാനലുകളിലേയും സീരിയൽ സംപ്രേക്ഷണം നിലയ്ക്കും. എന്നാൽ പഴയ എപ്പിസോഡുകൾ സംപ്രേക്ഷണം ചെയ്യാനാണ് ഇപ്പോഴുള്ള തീരുമാനമെന്ന് ചാനൽ വക്താക്കളെ ഉദ്ധരിച്ചു കൊണ്ട് ഐഇ മലയാളം റിപ്പോർട്ട് ചെയ്യുന്നു.

അതേസമയം നിലവിലെ സാഹചര്യത്തിൽ ലോക്ക് ഡൗണിനു ശേഷം ഷൂട്ടിങ്ങ് പുനരാരംഭിക്കണമെന്നുണ്ടെങ്കിൽ സർക്കാർ നിർദ്ദേശം ആവശ്യമായി വരും. മുൻപ് സംപ്രേക്ഷണം നടത്തിയിരുന്ന മഹാഭാരതം രാമായണം, ഭ്യോംകോശ്,ഷാരൂഖാൻ അഭിനയിച്ച പരമ്പരയായ സർക്കസ് എന്നിവ ദൂരദർശനിൽ‌ പുനഃസംപ്രേക്ഷണം ആരംഭിച്ചിട്ടുണ്ട്.

രാമായണവും മഹാഭാരതവും തിരികെ എത്തിയപ്പോൾ ജനങ്ങളുടെ പ്രിയപ്പെട്ട പരമ്പയായ ശക്തിമാനും പുനഃസംപ്രേക്ഷണം ചെയ്യണമെന്നുള്ള ആവശ്യം ശക്തമായിരിക്കുകയാണ്. ശക്തിമാൻ എന്ന ഹാഷ്ടാഗുകൾ സോഷ്യൽ മീഡിയയിൽ ഉയരുകയാണ്. ‘ഞങ്ങളുടെ ബാല്യകാല ഹീറോയെ മക്കളും കാണട്ടേ, ശക്തിമാനെ ഞങ്ങൾ മിസ് ചെയ്യുന്നു, ദയവായി ശക്തിമാന്റെ സംപ്രേക്ഷണം ചെയ്യൂ.. തുടങ്ങുന്ന ട്വീറ്റുകളും വ്യാപകമാകുകയാണ്. 90 കളിൽ ആരംഭിച്ച ഹിന്ദിയിലായിരുന്നു ആദ്യം സംപ്രേക്ഷണം തുടങ്ങിയത്.പിന്നീട് പ്രാദേശിക ഭാഷകളിലേക്ക് മൊഴിമാറ്റി സംപ്രേഷണം ചെയ്തു. മറ്റൊരു പരമ്പരയ്ക്കും ലഭിക്കാത്ത ജനപിന്തുണയായിരുന്നു ശക്തിമാൻ നേടിയെടുത്തത്.