കുട്ടിക്കാലം മുതലുള്ള ആ ഇഷ്ടം മാറിയിട്ടില്ല, എന്നാലും ഇപ്പോൾ സിംഗിൾ ആണ്; തുറന്നു പറഞ്ഞ് ടൈഗർ ഷ്രോഫ്

എന്നാൽ അടുത്തിടെ ദിഷയും ടൈഗറും പിരിഞ്ഞു എന്ന വാർത്തകൾ പുറത്തുവന്നിരുന്നു. ആറ് വർഷത്തെ പ്രണയത്തിന് ടൈഗറും ദിഷയും തിരശീലയിട്ടു എന്നായിരുന്നു റിപ്പോർട്ട്. എന്നാൽ താരങ്ങൾ പിരിഞ്ഞിട്ടില്ല നല്ല സൗഹൃദത്തിൽ ആണെന്നും റിപ്പോർട്ടുകൾ ഉണ്ടായി. ഇതിനിടയിൽ ആകാൻക്ഷ ശർമ്മയുമായി ടൈഗർ ഡേറ്റ് ചെയ്യുന്നു എന്ന വാർത്തകളും പ്രചരിച്ചിരുന്നു. എന്നാൽ ഇപ്പോഴിതാ താൻ സിംഗിൾ ആണെന്ന് തുറന്നു പറഞ്ഞിരിക്കുകയാണ് താരം.

കോഫി വിത്ത് കരൺ സീസൺ 7 ലാണ് ടൈഗർ ഷ്രോഫ് തന്റെ ഡേറ്റിംഗ് ജീവിതത്തെക്കുറിച്ച് തുറന്നു പറഞ്ഞിരിക്കുന്നത്, ഊഹാപോഹങ്ങൾക്കും റിപ്പോർട്ടുകൾക്കും വിരുദ്ധമായി, താൻ ഇപ്പോൾ സിംഗിൾ ആണെന്ന് താരം വ്യക്തമാക്കി. അതേസമയം ശ്രദ്ധ കപൂറിനോട് കുട്ടിക്കാലത്ത് തോന്നിയ ഇഷ്ടം ഇന്നും മാറിയിട്ടില്ലെന്ന് താരം വെളിപ്പെടുത്തി.

നിലവിൽ തന്റെ റിലേഷൻഷിപ് സ്റ്റാറ്റസ് എന്താണെന്ന് ചോദിച്ചപ്പോൾ ആണ് താൻ ഇപ്പോൾ സിംഗിൾ ആണെന്നും ആരെങ്കിലും ഉണ്ടോയെന്ന് ഇങ്ങനെ നോക്കി കൊണ്ട് ഇരിക്കുകയാണ് എന്നും ടൈഗർ പറഞ്ഞത്.

എന്നാൽ തന്റെ പ്രണയം തുറന്നു പറയൂ എന്ന് കരൺ ജോഹർ പറഞ്ഞപ്പോൾ ആയിരുന്നു, ബാഗിയിലും ബാഗി 3യിലും തനിക്കൊപ്പം അഭിനയിച്ച ശ്രദ്ധ കപൂറിനോട് തനിക്ക് ഇഷ്ടമുണ്ടെന്നും താരം പറഞ്ഞത്. ശ്രദ്ധ അടിപൊളിയാണെന്നും ടൈഗർ പറഞ്ഞു.

സ്‌കൂളിൽ പഠിക്കുമ്പോൾ തനിക്ക് ശ്രദ്ധയോട് പ്രണയം ഉണ്ടായിരുന്നുവെന്നും എന്നാൽ അവളോട് അത് പറയാൻ തനിക്ക് ധൈര്യം ഉണ്ടായിരുന്നില്ലെന്നും ടൈഗർ നേരത്തെ പറഞ്ഞിട്ടുണ്ട്. 2020 ൽ ബാഗി 3 യുടെ പ്രമോഷനുകളുടെ ഭാഗമായി നൽകിയ അഭിമുഖത്തിലാണ് അദ്ദേഹം സിദ്ധാർത്ഥ് കണ്ണനോട് ഇത് പറഞ്ഞത്,

'സ്കൂളിൽ പഠിക്കുമ്പോൾ എനിക്ക് അവളെ വലിയ ഇഷ്ടമായിരുന്നു...ഞാൻ അവളെ ദൂരെ നിന്ന് നോക്കുമായിരുന്നു. അവൾ എന്റെ ക്ലാസ് മുറിയുടെ ഇടനാഴിയിലൂടെ കടന്നുപോകുമ്പോൾ അവളുടെ മുടി പറക്കുന്നത് കാണാം,' എന്നായിരുന്നു അന്ന് ടൈഗർ പറഞ്ഞത്. എന്നാൽ ടൈഗറിന്റെ ഈ ഇഷ്ടത്തെ കുറിച്ച് താൻ ഒരിക്കലും അറിഞ്ഞിട്ടില്ലെന്ന് ശ്രദ്ധ പറഞ്ഞിരുന്നു.

കോഫി വിത്ത് കരൺ സീസൺ 7 ന്റെ ഒമ്പതാമത്തെ എപ്പിസോഡിൽ കൃതി സനോണിന് ഒപ്പമാണ് ടൈഗർ പങ്കെടുക്കുന്നത്. വ്യാഴാഴ്ച രാത്രിയാണ് എപ്പിസോഡ് സ്ട്രീമിങ് ആരംഭിക്കുക. 2014ൽ പുറത്തിറങ്ങിയ ഹീറോപന്തി എന്ന ചിത്രത്തിലൂടെയാണ് ടൈഗറും കൃതിയും ബോളിവുഡിൽ അരങ്ങേറ്റം കുറിച്ചത്. ഗണ്‍പത് ആണ് ടൈഗറിന്റെ പുതിയ സിനിമ. കൃതി നായികയാകുന്ന ചിത്രത്തിൽ അമിതാഭ് ബച്ചനും എത്തുന്നുണ്ട്. ബഡേ മിയ ചോട്ടെ മിയാ, റാംബോ തുടങ്ങിയവയാണ് ടൈഗറിന്റെ അണിയറയിലുള്ള മറ്റു സിനിമകള്‍.