ബൈജു കൊട്ടാരക്കര

ജീവചരിത്രം:  ചലച്ചിത്ര സംവിധായകനാണ് ബൈജു കൊട്ടാരക്കര.1994ൽ ബാബു ആന്റണിയെ നായകനാക്കി സംവിധാനം ചെയ്ത കമ്പോളമാണ് ബൈജുവിന്റെ ആദ്യ ചിത്രം.തൊട്ടടുത്ത ചിത്രമായ ബോക്സറിലും ബാബു ആന്റണി തന്നെയായിരുന്നു നായകൻ.പക്ഷേ ആദ്യ രണ്ട് ചിത്രങ്ങളും ബോക്സോഫീസിൽ വൻ പരാജയമായിരുന്നു.മുകേഷ് നായകനായ വംശമായിരുന്നു ബൈജുവിന്റെ മൂന്നാമത്തെ ചിത്രം.ഇതിന് പിന്നാലെ മനോജ് കെ ജയനെ നായകനാക്കി കലാപവും.ആദ്യത്തെ നാലു പടങ്ങളും തിയറ്ററുകളില്‍ വന്‍ പരാജയമായിരുന്നു. കലാഭവൻ മണി അടക്കമുള്ള ഹാസ്യ താരങ്ങളെ അണിനിരത്തി സംവിധാനം ചെയ്ത ജെയിംസ് ബോണ്ട് എന്ന ചിത്രത്തിലൂടെയാണ് ചലച്ചിത്രരംഗത്ത് ബൈജു അറിയപെടാന്‍ തുടങ്ങിയത്‌.ഭേദപ്പെട്ട കളക്ഷൻ നേടിയ ജെയിംസ് ബോണ്ടിന് പിന്നാലെ 2001ൽ കോട്ടയം നസീറടക്കമുള്ള കോമഡി താരങ്ങളെ ഉൾപ്പെടുത്തി കൂടറിയാതെ എന്ന ചിത്രം സംവിധാനം ചെയ്തു.സംവിധാനത്തിനു പുറമെ 1995ല്‍ പുറത്തിറങ്ങിയ ബോക്‌സര്‍ എന്ന ചിത്രത്തില്‍ അഭിനയിക്കുകയും ചെയ്തിട്ടുണ്ട്.സംവിധായകന്‍ എന്നതിലുപരി വിവാദ വിഷയങ്ങളിലൂടെയാണ് ബൈജു അറിയപെടാന്‍ തുടങ്ങിയത്. വിവാദ വിഷയങ്ങളെ ആസ്പദമാക്കി സിനിമയെടുക്കുമെന്ന് പ്രഖ്യാപിച്ചായിരുന്നു ബൈജു വാർത്തകളിലിടം പിടിച്ചത്.ശ്രീശാന്ത് അറസ്റ്റിലായപ്പോള്‍ ക്രിക്കറ്റര്‍, ചുംബനസമരം നടന്ന സമയത്ത് കിസ് ഓഫ് ലവ്,  ദിലീപ് അറസ്റ്റിലായപ്പോള്‍ പ്രമുഖ താരം എന്നിവയാണ് അദ്ദേഹം പ്രഖ്യാപിച്ച ചിത്രങ്ങള്‍.സിനിമാ രംഗത്തെ വിവാദങ്ങൾക്ക് പുറമേ സ്വകാര്യ ജീവിതത്തിലെ ചില വിവാദ വിഷയങ്ങളിലൂടെയും ബൈജു വാർത്തകളിലിടം നേടിയിരുന്നു. നടൻ കലാഭവൻ മണിയെ തട്ടിക്കൊണ്ടുപോയി മർദ്ദിച്ചെന്ന കേസിൽ ബൈജുവിനെതിരെ പരാതിയുണ്ടായതായി ആരോപണമുണ്ടായിരുന്നു.