അമ്മയാണ് എനിക്കെല്ലാം! എന്നെ മൂന്ന് മാസം ഗർഭിണി ആയിരിക്കുമ്പോൾ അച്ഛൻ നാടുവിട്ട് പോയതാണ്: കുളപ്പുള്ളി ലീല

'അമ്മയാണ് എനിക്ക് എല്ലാം. കൃഷ്ണന്‍ പോലും അത് കഴിഞ്ഞേയുള്ളൂ. ആറ് വര്‍ഷം മുന്‍പ് അമ്മ സീരിയസായി ആശുപത്രിയില്‍ കിടന്നിരുന്നു. ഡോക്ടര്‍മാര്‍ വരെ കൈയ്യൊഴിഞ്ഞ അവസ്ഥയായിരുന്നു. അമ്മ കിടക്കുന്നത് കണ്ടു നില്‍ക്കാൻ കഴിയുമായിരുന്നില്ല. കണ്ണൊന്നും തുറക്കുന്നുണ്ടായിരുന്നില്ല. ഭക്ഷണം ഒന്നും കഴിക്കില്ലായിരുന്നു. അങ്ങനെ സഹിക്കാന്‍ പറ്റാതെ വന്നതോടെയാണ് അമ്മയെക്കുറിച്ച് ഞാന്‍ പാട്ടെഴുതിയത്.'

'ചെറുപ്രായത്തില്‍ അമ്മയുടെ കല്യാണം കഴിഞ്ഞതാണ്. മൂന്ന് മാസം എന്നെ ഗര്‍ഭിണിയായിരിക്കുമ്പോൾ അച്ഛന്‍ നാടുവിട്ട് പോയി. എനിക്ക് നാല് വയസ്സുള്ളപ്പോഴാണ് തിരിച്ച് വന്നത്. അച്ഛന്റെ വീട്ടുകാരായിരുന്നു അമ്മയെ നോക്കിയത്. അവര്‍ തന്നെയാണ് അമ്മയെ വേറെ വിവാഹം കഴിപ്പിച്ചത്. 19ാം വയസിൽ എന്തോ ആണ് എന്നെ പ്രസവിച്ചത്. പതിനാലാം വയസ്സിലോ മറ്റോ ആയിരുന്നു. അപ്പോൾ ആ അമ്മ എത്രത്തോളം ബുദ്ധിമുട്ടിയിട്ടുണ്ട്.'

'അച്ഛന്‍ അതുപോലെ കഷ്ടപ്പെട്ടിട്ടാണ് മരിച്ചത്. ക്യാൻസറായിരുന്നു. മൂന്നാലഞ്ച് കല്യാണമൊക്കെ കഴിച്ചിട്ടുണ്ട്. ഞാന്‍ അപ്പോഴൊക്കെ പോകാറുണ്ടായിരുന്നു. അതിലുള്ളൊരു ആങ്ങള എന്നെ വിളിക്കാറുണ്ട്. എന്തേലും ആവശ്യമുണ്ടെങ്കില്‍ വിളിച്ചോളൂ എന്ന് അവന്‍ പറഞ്ഞിരുന്നു. അത് ഒട്ടും പ്രതീക്ഷിച്ചതല്ല. അത് എനിക്ക് വലിയ സന്തോഷമുള്ള കാര്യമായിരുന്നു. ആരേയും ബുദ്ധിമുട്ടിക്കാതെ, ആരോടും ചോദിക്കാതെ മുന്നോട്ട് പോവാനാവണമെന്നാണ് എന്റെ ആഗ്രഹം.' കുളപ്പുള്ളി ലീല പറഞ്ഞു.

സിനിമകളിൽ ചിലർ തനിക്ക് പാര പണിയുന്നുണ്ട് എന്നും നടി പറയുന്നുണ്ട്. 'സിനിമയ്ക്ക് വിളിയ്ക്കുന്നവരോട് പറയുള്ളത് തുണിയും വേണം, പൈസയും തരണമെന്നാണ്. ഏത് കഥാപാത്രമായാലും കുഴപ്പമില്ല. ഒരു സീനിലായാലും ഞാന്‍ അഭിനയിക്കും.' അവർ പറഞ്ഞു. തന്റെ കഥാപാത്രങ്ങൾ ശ്രദ്ധിക്കപ്പെടാറുണ്ട്. അതിൽ ദൈവത്തിന് നന്ദി പറയുന്നു വെന്നും കുളപ്പുള്ളി ലീല പറഞ്ഞു.

നടന്ന് പോവാനാവുന്നത്ര അടുത്ത് പല ഷൂട്ടിങ്ങുകളും നടക്കാറുണ്ട്. പക്ഷേ, തന്നെ ആരും വിളിക്കാറില്ല. ഞാന്‍ വലിയ ആളായെന്നൊക്കെയാണ് പറയുന്നത്. തമിഴിലൊക്കെ പോയതോടെ പ്രതിഫലം കൂടി, സെറ്റില്‍ വലിയ പ്രശ്‌നക്കാരിയാണ് എന്നൊക്കെ പറയുന്ന കേട്ടിരുന്നു. എന്തിനാണ് ആളുകള്‍ ഇങ്ങനെ പാര പണിയുന്നതെന്നറിയില്ല. അമ്മയെ അവസാനം വരെ നോക്കണം. ആരുടെ മുന്നിലും കൈനീട്ടാതെ ജീവിക്കണം ഇതേയുള്ളൂ തന്റെ ആഗ്രഹമെന്നും കുളപ്പുള്ളി ലീല പറയുന്നു.