കാഴ്ചക്കാരുടെ കിളി പറത്തി വിടുന്ന സംവിധായകന്‍; കണ്ടിരിക്കേണ്ട അഞ്ച് നോളന്‍ സിനിമകള്‍

മെമന്റോ

ക്രിസ്റ്റഫര്‍ നോളന്‍ എന്ന സംവിധായകന്റെ ഏറ്റവും മികച്ച സിനിമയെന്ന് വിശേഷിപ്പിക്കപ്പെടുന്ന സിനിമയാണ് മെമന്റോ. നോണ്‍ ലീയര്‍ നരേഷന്‍ കൊണ്ട് നോളന്‍ പ്രേക്ഷകരെ ഞെട്ടിക്കുകയായിരുന്നു ചിത്രത്തിലൂടെ. ഓര്‍മ്മകളുടെ അടുക്കും ചിട്ടയുമില്ലാത്ത സഞ്ചാരത്തിലൂടെ കഥ പറഞ്ഞ ചിത്രത്തിലെ നായകന്‍ ഗായ് പീയേഴ്സ് ആയിരുന്നു. തന്റെ ഭാര്യയുടെ ഘാതകനെ തേടിയുള്ള നായകന്റെ ജീവിതം അവതരിപ്പിച്ച ചിത്രത്തിന് ഇങ്ങ് ഇന്ത്യയിലും വരെ റീമേക്കുണ്ടായി.

ദ പ്രസ്റ്റീജ്

2006 ല്‍ പുറത്തിറങ്ങിയ സിനിമ. നോളന്റെ കൈയ്യൊപ്പ് പതിഞ്ഞ ചിത്രം. സയന്‍സ് ഫിക്ഷനും സൈക്കോളജിക്കല്‍ ത്രില്ലറുമൊക്കെയായ സിനിമ രണ്ട് മാന്ത്രികന്മാരുടെ പരസ്പര വൈര്യത്തിന്റെ കഥയായിരുന്നു പറഞ്ഞിരുന്നത്. ക്രിസ്ത്യന്‍ ബെയ്‌ലും ഹ്യൂ ജാക്ക്മാനുമായിരുന്നു പ്രധാന വേഷങ്ങളിലെത്തിയത്. സബ് പ്ലോട്ടുകള്‍ കൊണ്ടും ദ പ്രസ്റ്റീജ് ഇപ്പോഴും ആരാധകര്‍ക്കിടയില്‍ സജീവമായി തന്നെ ചര്‍ച്ചയാകുന്ന ചിത്രമാണ്.

ദ ഡാര്‍ക്ക് നൈറ്റ്

നോളന്റെ തന്നെ ബാറ്റ്മാന്‍ ബിഗിന്‍സിന്റെ രണ്ടാം ഭാഗവും. ഡാര്‍ക്ക് നൈറ്റ് ട്രയോളജിയിലെ രണ്ടാമത്തെ ചിത്രവും. ബാറ്റ്മാന്‍ എന്ന ലോക പ്രശസ്ത സൂപ്പര്‍ ഹീറോയുടെ അതുവരെ കാണാത്ത നരേഷനായിരുന്നു ട്രയോളജിയില്‍ കണ്ടത്. ജോക്കര്‍ എന്ന വില്ലനെ ഹീറോ പരിവേഷത്തിലേക്ക് എത്തിക്കുകയും ചെയ്തു ദ ഡാര്‍ക്ക് നൈറ്റിലൂടെ. ഇന്നുവരെ ഇറങ്ങിയ സൂപ്പര്‍ ഹീറോ ചിത്രങ്ങളില്‍ ഏറ്റവും മികച്ചവയുടെ പട്ടികയില്‍ ഉറപ്പായും ദ ഡാര്‍ക്ക് നൈറ്റുണ്ടാകും. ക്രിസ്റ്റ്യന്‍ ബെയിലിന്‌റെ ബാറ്റ്മാനും ഹീത്ത് ലെഡ്ജറുടെ ജോക്കറും ഒരിക്കലും മറക്കാത്ത അനുഭവമാക്കി മാറ്റുകയായിരുന്നു നോളന്‍.

ഇന്‍സെപ്ഷന്‍

നോളന്‍രെ ഏറ്റവും കോമ്പ്‌ളിക്കേറ്റഡ് ആയ സിനിമകളിലൊന്ന്. ഒന്നിലധികം കാഴ്ചകള്‍ ചിലപ്പോള്‍ ആവശ്യപ്പെടുന്ന, ഇറങ്ങി ചെല്ലുന്തോറും കൂടുതല്‍ അത്ഭുതവുമായി മാറുന്ന സിനിമയാണ് ഇന്‍സെപ്ഷന്‍. ലിയനാര്‍ഡോ ഡികാപ്രിയോ പ്രധാനവേഷത്തിലെത്തിയ സിനിമ സ്വപ്‌നങ്ങള്‍ക്കുള്ളിലെ സഞ്ചാരത്തിന്റെ കഥയായിരുന്നു പറഞ്ഞിരുന്നത്. നാല് ഓസ്‌കാറുകളാണ് സിനിമ നേടിയത്.

Recommended Video

ആ സംഭവത്തിന് ശേഷം മമ്മൂട്ടിയുടെയും സുഹാസിനിയുടെയും പേരുകള്‍ ഗോസിപ്പുകളില്‍ നിറഞ്ഞു

ഇന്റര്‍സ്‌റ്റെല്ലാര്‍

സയന്‍സ് ഫിക്ഷന്‍ സിനിമകളുടെ കൂട്ടത്തില്‍ ഏറ്റവും മുന്‍പന്തിയിലുള്ള സിനിമകളിലൊന്ന്. കണ്ടാല്‍ മാത്രം മതിയാകില്ല ഇന്റര്‍സ്റ്റെല്ലാര്‍ ആസ്വദിക്കാന്‍. വീണ്ടും വീണ്ടും കാണാന്‍ തോന്നിപ്പിക്കുന്ന ഓരോ കാഴ്ചയിലും പുതിയ അനുഭവമായി മാറുന്ന അത്ഭുതം. ചിത്രത്തിന്റെ മേക്കിംഗും ആശയവുമെല്ലാം സമാനതകളില്ലാത്തതായിരുന്നു. ഏതൊരു സിനിമാപ്രേമിയും കണ്ടിരിക്കേണ്ട സിനിമകളിലൊന്ന്.