ആ കഥാപാത്രത്തെ ഏറ്റെടുത്തപ്പോള്‍ ടെന്‍ഷനായിരുന്നു! തണ്ണീര്‍മത്തനെക്കുറിച്ച് വിനീത് ശ്രീനിവാസന്‍!

മുന്‍പൊരിക്കലും ചെയ്യാത്ത തരത്തിലുള്ള കഥാപാത്രവുമായാണ് ഇത്തവണ വിനീത് എത്തിയത്. സൈക്കോ രവി എന്ന് പലരും തന്നെ വിളിക്കാറുണ്ടെന്ന് അദ്ദേഹം പറയുന്നു. ഈ കഥാപാത്രത്തെ എങ്ങനെ അവതരിപ്പിക്കും എന്നോര്‍ത്തുള്ള ആശങ്കയായിരുന്നു ആദ്യനാളില്‍ തോന്നിയത്. തന്റെ മനസ്സിലുള്ള ഐഡിയയായിരുന്നില്ല സംവിധായകന്റെ മനസ്സില്‍. രണ്ടാമത്തെ ദിവസം മുതല്‍ എല്ലാം ആസ്വദിച്ച് തുടങ്ങുകയായിരുന്നു. എന്തെങ്കിലുമൊരു കൊനുഷ്ടില്ലാത്ത സീന്‍ ഇല്ലെന്ന സ്ഥിതിയായിരുന്നു. കുഞ്ഞിരമായാണത്തിലെ കഥാപാത്രത്തിനും കൊനുഷ്ടുണ്ടായിരുന്നു, എന്നാല്‍ അത് പോലെയല്ല ഇത്.

ശ്രീനിവാസന്‍ മാത്രമല്ല അദ്ദേഹത്തിന്റെ മക്കളും എഴുത്തില്‍ മികവ് തെളിയിച്ചുകൊണ്ടിരിക്കുകയാണ്. കഥയെക്കുറിച്ചുള്ള ഐഡിയ കിട്ടിയാല്‍ക്കൂടിയും അതെഴുതിത്തുടങ്ങാന്‍ നാളുകളെടുക്കാറുണ്ട്. ഇടയ്ക്ക് വേണ്ട എന്ന് തോന്നി മാറ്റാറുണ്ട്, കഥയെക്കുറിച്ചുള്ള ആശയം എപ്പോള്‍ കിട്ടിയാലും അത് ഫോണില്‍ റെക്കോര്‍ഡ് ചെയ്യാറുണ്ട്. ഫോണ്‍ റെക്കോര്‍ഡിംഗ് എപ്പോഴും കൈയ്യിലുണ്ടാവാറുണ്ട്. ആവശ്യം വരുമ്പോള്‍ ഈ റെക്കോര്‍ഡിംഗ് മുഴുവനും കേള്‍ക്കാറുണ്ട്. തട്ടത്തിന്‍ മറയത്ത് മുതലുള്ള എല്ലാ സിനിമകളും അങ്ങനെ സംഭവിച്ചതാണ്.

മലര്‍വാടി ആര്‍ട്‌സ് ക്ലബ് എന്ന ചിത്രത്തിലൂടെയായിരുന്നു വിനീത് ശ്രീനിവാസന്‍ സംവിധാന രംഗത്ത് അരങ്ങേറിയത്. ആ സിനിമ പുതിയ ആളുകളെ വെച്ച് ചെയ്യാന്‍ തീരുമാനിച്ചതിന് പിന്നില്‍ ചില കാരണങ്ങളുണ്ട്. വെങ്തട് പ്രഭുവിന്റെ സിനിമകളിലൂടെ ഒരു സംഘമാളുകള്‍ വന്ന് തമിഴ് സിനിമയെ ഒന്നാകെ മാറ്റി മറിക്കുന്നത് കണ്‍മുന്നില്‍ കണ്ടിരുന്നു. മലയാളത്തില്‍ ഇത് നടക്കുന്നുണ്ടായിരുന്നില്ല, അങ്ങനെയാണ് മലര്‍വാടിയിലൂടെ ആ പരീക്ഷണം നടത്തിയത്.

വീണ്ടും സംവിധായകനായി വരാനുള്ള തയ്യാറെടുപ്പിലാണ് താനെന്ന് വിനീത് ശ്രീനിവാസന്‍ നേരത്തെ വ്യക്തമാക്കിയിരുന്നു. പ്രണവ് മോഹന്‍ലാലിനെ നായകനാക്കിയുള്ള ചിത്രവുമായാണ് ഇനി എത്തുന്നത്. നിലവില്‍ ഏറ്റെടുത്ത ചിത്രങ്ങളുടെ ജോലികള്‍ പൂര്‍ത്തിയാക്കിയതിന് ശേഷമേ ആ സിനിമയിലേക്ക് കടക്കൂ. ആദിയിലൂടെയായിരുന്നു പ്രണവ് നായകനായി അരങ്ങേറിയത്. ഇരുപത്തിയൊന്നാം നൂറ്റാണ്ടുമായി രണ്ടാമത് പ്രേക്ഷകര്‍ക്ക് മുന്നിലേക്ക് എത്തിയെങ്കിലും ആ വരവില്‍ ആരാധകര്‍ തൃപ്തരായിരുന്നില്ല.