മണി സാർ ഞങ്ങളോട് സംസാരിക്കരുതെന്ന് പറഞ്ഞു; ഐശ്വര്യക്കൊപ്പം പ്രവർത്തിക്കുന്നത് വെല്ലുവിളിയായിരുന്നെന്ന് തൃഷ

താൻ ഏറെ ആരാധിക്കുന്ന ഐശ്വര്യ റായിക്ക് ഒപ്പമുള്ള തന്റെ ഷൂട്ടിങ് അനുഭവങ്ങൾ പങ്കുവയ്ക്കാൻ ആവശ്യപ്പെട്ടപ്പോഴാണ് തൃഷ അത് ഏറെ വെല്ലുവിളി നിറഞ്ഞതായിരുന്നു എന്ന് പറഞ്ഞത്. 'ആദ്യ ദിവസം തന്നെ ഐശ്വര്യ മാഡവുമായി സംസാരിക്കാന്‍ എനിക്കു ഭാഗ്യം കിട്ടിയിരുന്നു. അവർ അകത്തും പുറത്തും വളരെ നല്ലൊരു സ്ത്രീയാണ്. ഞാന്‍ പറയാതെ തന്നെ നിങ്ങള്‍ക്കറിയായിരിക്കുമല്ലോ അത്. പ്രശ്‌നം എന്താണെന്ന് വച്ചാൽ സിനിമയിൽ ഞങ്ങൾ എതിര്‍ കഥാപാത്രങ്ങളായിട്ടാണ് അഭിനയിക്കുന്നത്. പരസ്‌പരം അങ്ങനെ ഇഷ്ടപ്പെടാൻ പാടില്ലായിരുന്നു. അങ്ങനെ ആയപ്പോൾ അത് ഏറെ വെല്ലുവിളി നിറഞ്ഞതായിരുന്നു,' തൃഷ പറഞ്ഞു.

തങ്ങൾ സംസാരിക്കുമ്പോൾ മണിരത്‌നം സാർ ഇടപെടുമായിരുന്നുവെന്നും തൃഷ പറഞ്ഞു. 'ഞങ്ങൾ സംസാരിക്കുമ്പോൾ മണി സാർ (മണിരത്നം) പറയാറുണ്ടായിരുന്നു, 'നോക്കൂ, നിങ്ങൾ വളരെയധികം സംസാരിക്കുന്നു, സംസാരിക്കുന്നത് നിർത്തൂ, എന്റെ സീനിൽ ഈ സൗഹൃദം ഒന്നും ഉണ്ടാകില്ല'. എന്ന്.

ഐശ്വര്യയ്‌ക്കൊപ്പം പ്രവർത്തിക്കാൻ കഴിഞ്ഞത് ഒരു ബഹുമതിയാണെന്ന് തൃഷ പറഞ്ഞു. നാല് വർഷത്തെ ഇടവേളയ്ക്ക് ശേഷമാണ് ഐശ്വര്യ റായ് ബച്ചൻ വീണ്ടും ബിഗ് സ്‌ക്രീനിൽ എത്തുന്നത്. ചിത്രത്തിൽ നന്ദിനി എന്ന രാജ്ഞി ആയിട്ടാണ് ഐശ്വര്യ അഭിനയിക്കുന്നത്. ചിത്രത്തിന്റെ ട്രെയിലർ ആരാധകരെ വിസ്മയിപ്പിച്ചിരുന്നു. ഇതിനോടകം പുറത്തിറങ്ങിയ ഗാനവും ഏറെ ശ്രദ്ധനേടിയിട്ടുണ്ട്.

മണിരത്‌നത്തിനൊപ്പം പൊന്നിയിൻ സെൽവനിൽ പ്രവർത്തിച്ചതിനെ കുറിച്ച് സംസാരിക്കവെ, അദ്ദേഹമാണ് തന്റെ ഗുരുവെന്നും ഇനിയും ഈ അവസരത്തിന് അദ്ദേഹത്തോട് എപ്പോഴും നന്ദി പറയുന്നതായും ഐശ്വര്യ പറഞ്ഞിരുന്നു. മണിരത്‌നം തന്റെ അദ്ധ്യാപകനാണെന്നും താൻ ജീവിതകാലം മുഴുവൻ അദ്ദേഹത്തിന്റെ വിദ്യാർത്ഥിയായിരിക്കുമെന്നും പറഞ്ഞിരുന്നു.

ചിത്രത്തിൽ ഇരട്ട കഥാപാത്രത്തെയാണ് ഐശ്വര്യ അവതരിപ്പിക്കുന്നത് എന്നാണ് വിവരം. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലാണ് ചിത്രം പ്രദർശനത്തിനെത്തുന്നത്. സെപ്റ്റംബർ 30 നാണ് ചിത്രത്തിന്റെ റിലീസ്.