'വിവാഹ നിശ്ചയം ഉടൻ', കത്രീനയുമായുള്ള ​ഗോസിപ്പ് വാർത്തകളോട് പ്രതികരിച്ച് വിക്കി കൗശൽ

സിനിമാ താരങ്ങൾ പരസ്പരം വിവാഹിതരാകുന്നത് എന്നും ആരാധകരെ സന്തോഷിപ്പിക്കുന്ന കാര്യമാണ്. സ്ക്രീനിലെ ജോഡികൾ ജീവിതത്തിലും ഒന്നിക്കുമ്പോൾ ആരാധകർ അത് ആഘോഷമാക്കാറുമുണ്ട്. അത്തരത്തിൽ ആരാധകർ ഇപ്പോൾ ഏറ്റവും കൂടുതൽ ആ​ഗ്രഹിക്കുന്ന ഒന്നാണ് വിക്കി കൗശൽ കത്രീന കൈഫ് വിവാഹം. ഇരുവരും തമ്മിൽ പ്രണയത്തിലാണെന്ന് അടുത്തിടെ ഒരു ചാറ്റ്ഷോയിൽ പങ്കെടുത്തുകൊണ്ട് ഹർഷ് വർധൻ കപൂറും പറഞ്ഞിരുന്നു. കൂടാതെ പൊതുപരിപാടികളിലും കത്രീനയും വിക്കിയും ഒരുമിച്ച് എത്താൻ തുടങ്ങിയതോടും കൂടി ആരാധകരുടെ സംശയം വർധിച്ചിരിക്കുകയാണ്.

ഇരുവർക്കും വേണ്ടി പ്രത്യേക ഫാൻസ് പേജുകളും ഇപ്പോൾ സോഷ്യൽമീഡിയയിൽ സജീവമാണ്. തന്നേയും നടി കത്രീനയേയും ചേർത്ത് വരുന്ന വാർത്തകളിലെ തന്റെ നിലാപാട് വ്യക്തമാക്കിയിരിക്കുകയാണിപ്പോൾ വിക്കി കൗശൽ. അദ്ദേഹത്തിന്റെ പുതിയ സിനിമ സർദാർ ഉദ്ധമിന്റെ പ്രമോഷനുമായി ബന്ധപ്പെട്ട് നടന്ന പരിപാടിയിൽ സംസാരിക്കവെയായിരുന്നു വിക്കിയുടെ പ്രതികരണം. ഇത്തരം വാർത്തകൾ പ്രചരിപ്പിക്കുന്ന മാധ്യമങ്ങളെ പരിഹാസത്തിലൂടെ കുറ്റപ്പെടുത്തിയാണ് വിക്കി പ്രതികരിച്ചത്. ശരിയായ സമയം വരുമ്പോൾ അധികം വൈകാതെ തന്റെ വിവാഹനിശ്ചയം ഉണ്ടാകുമെന്നാണ് വിക്കി കൗശൽ മറുപടിയായി പറഞ്ഞത്.

വിക്കിയും കത്രീനയും തമ്മിലുള്ള വിവാഹനിശ്ചയം വളരെ ലളിതമായി കഴിഞ്ഞുവെന്ന തരത്തിൽ അടുത്തിടെ വാർത്തകളും ഇരുവരുടേയും ഫോട്ടോകളും പ്രചരിച്ചിരുന്നു. ചുവന്ന ലഹങ്കയണിഞ്ഞ് നവവധുവിനെ പോലെയാണ് കത്രീന ഫോട്ടോയിൽ പ്രത്യക്ഷപ്പെട്ടത്. ക്രീം നിറത്തിലുള്ള കുർത്തയണിഞ്ഞാണ് വിക്കി ഫോട്ടോയിലുണ്ടായിരുന്നത്. എന്നാൽ ആ വാർത്തകളും ഫോട്ടോയും സത്യമാണോ എന്നതിൽ വ്യക്തതയും വന്നിട്ടില്ല. വിക്കിയും കത്രീനയും തമ്മിൽ വളരെക്കാലമായി അടുത്ത ബന്ധത്തിലാണ്. വിക്കി ഇടയ്ക്കിടെ കത്രീനയെ സന്ദർശിക്കാറുണ്ട്. കത്രീനയും വിക്കിക്കൊപ്പം ഇടയ്ക്കിടെ പ്രത്യക്ഷപ്പെടാറുണ്ട്. സർദാർ ഉദ്ധമിന്റെ സ്ക്രീനിങിനും കത്രീന എത്തിയിരുന്നു. സിനിമ കണ്ടശേഷം നായകൻ വിക്കിയേയും സംവിധായകൻ ഷൂജിത് സിർക്കാറിനെയും അഭിനന്ദിച്ച് കുറിപ്പും കത്രീന പങ്കുവെച്ചിരുന്നു.

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

അടുത്തിടെ വിക്കി-കത്രീന റൂമറുകളോട് വിക്കിയുടെ സഹോദരന് സണ്ണി കൗശലും പ്രതികരിച്ചിരുന്നു. അദ്ദേഹം പറഞ്ഞത് ഇങ്ങനെയാണ് 'ഒരിക്കൽ ജിമ്മിൽ നിന്നും വർക്കൗട്ട് കഴിഞ്ഞ് മടങ്ങിയെത്തിയ വിക്കിയോട് ഞങ്ങളുടെ മാതാപിതാക്കൾ ചോദിച്ചു... നിന്റെ വിവാഹനിശ്ചയം കഴിഞ്ഞിട്ട് നീയെന്തുകൊണ്ടാണ് ഞങ്ങളെ അറിയിക്കുകയോ ഞങ്ങൾക്ക് മധുരം നൽകുകയോ ചെയ്യാതിരുന്നത്...? അതിന് വിക്കി മറുപടി നൽകിയത്.... വിവാഹനിശ്ചയം സാങ്കൽപികമായിരുന്നതിനാൽ അതിന്റെ പേരിലുള്ള മധുരവിതരണവും സാങ്കൽപികമാണ്... എന്നായിരുന്നു' ചിരിച്ചുകൊണ്ട് സണ്ണി കൗശൽ പറഞ്ഞു. അക്ഷയ്കുമാർ സിനിമ സൂര്യവൻഷിയാണ് ഇനി റിലീസിനെത്താനുള്ള കത്രീന കൈഫ് ചിത്രം.