'എന്നോടൊപ്പം അഭിനയിക്കാൻ താൽപര്യമില്ലെന്ന് പറഞ്ഞ താരങ്ങൾ നിരവധി'; തുറന്ന് പറഞ്ഞ് താപ്സി

സ്ത്രീ മുഖ്യകഥാപാത്രമാകുന്നുവെന്നതായിരുന്നു പല നടന്മാരും തന്റെ സിനിമകളിൽ നിന്നും പിന്മാറാൻ കാരണമായതെന്നും പുതുമുഖ നടന്മാർ പോലും തന്റെ സിനിമകളിൽ അഭിനയിക്കുന്നതിൽ താൽപര്യം കാണിച്ചിരുന്നില്ലെന്നും താപ്സി വെളിപ്പെടുത്തി. വാണി ത്രിപാതിയുമായി നടത്തിയ അഭിമുഖത്തിലായിരുന്നു താപ്സിയുടെ വെളിപ്പെടുത്തൽ. തന്നോടൊപ്പം പ്രവർത്തിക്കാതിരിക്കാൻ നടന്മാർ പറഞ്ഞിരുന്ന കാരണങ്ങളും താപ്സി വെളിപ്പെടുത്തി. 'ഞാൻ ഡബിൾ റോൾ ചെയ്യുന്ന സിനിമയിൽ അഭിനയിക്കാൻ ആവശ്യപ്പെട്ട് ഒരു പ്രമുഖ താരത്തെ സമീപിച്ചിരുന്നു പക്ഷെ അദ്ദേഹം അഭിനയിക്കാൻ കൂട്ടാക്കിയില്ല. ശേഷം മറ്റൊരു നടനെ സമീപിച്ചു. ഞങ്ങൾ മുമ്പ് ഒരുമിച്ച് പ്രവർത്തിച്ചിട്ടുണ്ട്. കാര്യം അവതരിപ്പിച്ചപ്പോൾ അദ്ദേഹം പറഞ്ഞു. 'എനിക്ക് ഈ സിനിമ ചെയ്യാൻ താൽപ്പര്യമില്ല.... കാരണം.... യഥാർത്ഥത്തിൽ സിനിമ അവസാനിക്കുമ്പോൾ പ്രേക്ഷകരുടെ സഹതാപം നായികയായ പെൺകുട്ടിയോട് ആയിരിക്കും കൂടുതൽ'. അതൊരു പ്രണയകഥയായിരുന്നു.... അദ്ദേഹത്തെ പോലൊരു നടനിൽ കുറച്ചുകൂടി ആത്മവിശ്വാസവും സുരക്ഷിതത്വബോധവും പ്രതീക്ഷിക്കുന്നതായി ഞാൻ അദ്ദേഹത്തോട് പറഞ്ഞു. പക്ഷെ സിനിമ ചെയ്യാൻ സാധിക്കില്ലെന്ന് പറ‍ഞ്ഞു. അദ്ദേഹം ഒരു വലിയ താരമാണ്. ഞങ്ങൾ എല്ലാ ദിവസവും കടന്നുപോകുന്ന സങ്കടകരമായ സത്യമാണിത്' താപ്സി പറയുന്നു.

'എന്റെ സിനിമകൾക്കായി ഷോർട്ട്‌ലിസ്റ്റ് ചെയ്ത മികച്ച അഞ്ച് അഭിനേതാക്കളുടെ പട്ടികയുമായി ഞാൻ എന്റെ നിർമാതാക്കളുമായി ചർച്ചയ്ക്ക് ഇരിക്കും. ആ ലിസ്റ്റിലുള്ളവരിൽ ഏറെയും ഒന്നോ രണ്ടോ സിനിമകൾ മാത്രം ചെയ്തവരാണ്. അവർ പോലും തന്റെ സിനിമകളിലെ വേഷം നിരസിക്കുകയാണ്. അവർക്ക് ആ സിനിമയിൽ വെറും പത്ത് ശതമാനം മാത്രമെ അഭിനയിക്കാനുള്ളൂവെന്ന കാരണമാണ്. അത്തരത്തിൽ അവരെ കൊണ്ട് ചിന്തിപ്പിക്കുന്നതും പ്രവർത്തിപ്പിക്കാൻ പ്രേരിപ്പിക്കുന്നതും ഇന്ന് ഇന്ത്യൻ സിനിമയിൽ നിലനിൽക്കുന്ന ചില അലിഖിത നിയമങ്ങളാണ്' താപ്സി കൂട്ടിച്ചേർത്തു. രശ്മി റോക്കറ്റ് എന്ന ബയോപിക്കാണ് അവസാനമായി റിലീസ് ചെയ്ത താപ്സി പന്നു സിനിനമ. സിനിമയ്ക്ക് സമ്മശ്ര പ്രതികരണമാണ് ലഭിച്ചത്.

Recommended Video

തപ്സിക്കെതിരെ കങ്കണ വീണ്ടും രംഗത്ത്

ആകർഷ് ഖുറാന സംവിധാനം ചെയ്ത സിനിമയായിരുന്നു രശ്മി റോക്കറ്റ്. ആകാശ് ഭാട്ടിയയുടെ ലൂപ്പ് ലപേട്ട എന്ന സിനിമയിലാണ് താപ്സി ഇപ്പോൾ അഭിനയിച്ചുകൊണ്ടിരിക്കുന്നത്. ഹോളിവുഡ് ഹിറ്റ് ചിത്രം റൺ ലോല റണ്ണിന്റെ റീമേക്കാണ് ലൂപ്പ് ലപേട്ട. സഭാഷ് മിത്തുവാണ് അണിയറയിൽ ഒരുങ്ങുന്ന മറ്റൊരു താപ്സി പന്നു സിനിമ. ഇന്ത്യൻ വനിത ക്രിക്കറ്റ് താരം മിതാലി രാജിന്റെ ജീവിതമാണ് സഭാഷ് മിത്തു. വോ ലഡ്കി ഹേ കഹാൻ ആണ് താപ്സിയുടെ മറ്റൊരു പുതിയ സിനിമ. പ്രതിക് ​ഗാന്ധിയാണ് സിനിമയുടെ സംവിധായകൻ.