തല്ലുമാല

യുവത്വം അനുഭവിക്കുന്ന എല്ലാ പ്രിവിലേജുകളും ചേർത്തൊരു പ്രമേയമാണ് ഈ ചിത്രം. തല്ലു കഥ പറയുമ്പോ, അത് തല്ലിപ്പൊളിയാവാതെ നോക്കാൻ സംവിധായകൻ ഖാലിദ് റഹ്മാന്റെ നേതൃത്വത്തിലെ അണിയറക്കാർ ചെറുതല്ലാത്ത ശ്രദ്ധ നൽകിയിട്ടുണ്ട്.

സിനിമ തുടങ്ങി പത്താം മിനിറ്റിൽ തുടങ്ങുന്ന അടി അവസാനിക്കുന്നത് ക്ലൈമാക്സിലാണ്. പുതുമ ഇഷ്ടപ്പെടുന്നവർക്കും തട്ടുപൊളിപ്പന്‍ കളർഫുൾ എന്റർടെയ്ൻമെന്റ് സിനിമകളുടെ ആരാധകർക്കും തല്ലുമാല ഒരു വിരുന്നു തന്നെയാകും.

സെമി റിയലിസത്തിന് പ്രാധാന്യം കൊടുക്കുന്ന സമീപകാലത്ത് മലയാള സിനിമയില്‍ വൈവിധ്യം കുറയുന്നുവെന്ന ചര്‍ച്ചകള്‍ക്കിടെയാണ് പുതുമയുള്ള ദൃശ്യഭാഷയില്‍ ഒരു ആക്ഷന്‍ കോമഡി ചിത്രം എത്തിയിരിക്കുന്നത്. റിലീസിനു മുന്‍പ് പരസ്യങ്ങളിലൂടെ സൃഷ്ടിച്ച പ്രതിച്ഛായ എന്താണോ അതുതന്നെ സ്ക്രീനില്‍ നല്‍കുന്നതില്‍ വിജയിച്ചിട്ടുണ്ട് തല്ലുമാലയുടെ അണിയറക്കാര്‍.