'എലീന ​ഗർഭിണിയായിരുന്നു, രാത്രി മുഴുവൻ ന​ഗരങ്ങളിലൂടെ നടന്നു'; വെളിപ്പെടുത്തി ബാലു വർ​ഗീസ്

സിനിമ കഴിഞ്ഞാൽ ബാലു ഏറ്റവും കൂടുതൽ സ്നേഹിക്കുന്നത് യാത്രകളെയാണ്. സമയം കിട്ടുമ്പോഴെല്ലാം നല്ലപാതി എലീനയ്ക്കൊപ്പവും സുഹൃത്തുക്കൾക്കൊപ്പം കേരളത്തിനകത്തും പുറത്തുമായി നിരവധി യാത്രകൾ ബാലു നടത്തി കഴിഞ്ഞു. കൊവിഡ് കാലത്താണ് ഈ യാത്രകൾ‌ മുടങ്ങിപോയത്. വിദേശ രാജ്യങ്ങളിലേത്ത് നടത്തിയ യാത്രകളിലെ മറക്കാനാവാത്ത അനുഭവങ്ങളെ കുറിച്ചും പുതിയ സിനിമയുടെ വിശേഷങ്ങളെ കുറിച്ചും മനസ് തുറന്നിരിക്കുകയാണ് ബാലു വർ​ഗീസ് ഇപ്പോൾ. ഭാര്യ എലീന ​ഗർഭിണിയായിരുന്നപ്പോൾ ദുബായ് സന്ദർശിക്കാൻ പോയപ്പോഴുണ്ടായ അനുഭവത്തെ കുറിച്ചും ബാലു വർ​ഗീസ് വെളിപ്പെടുത്തി.

'യാത്രകളെ ഇഷ്ടപ്പെടുന്നവർ ഏറ്റവും വെറുക്കുന്ന രണ്ട് വർഷങ്ങളാണ് കടന്നുപോകുന്നത്. എന്നെക്കാൾ കൂടുതൽ ട്രിപ്പുകൾ മിസ് ചെയ്യുന്നത് എലീനയ്ക്ക് തന്നെയാണ്. എലീന ഗർഭിണിയായിരുന്ന സമയത്തും ഞങ്ങൾ കേരളത്തിൽത്തന്നെ യാത്രകൾ നടത്തിയിരുന്നു. അന്ന് കോവിഡ് നിയന്ത്രണങ്ങൾ നാട്ടിൽ കുറവായിരുന്നു. സമയം കിട്ടുമ്പോഴൊക്കെ ഞങ്ങൾ വണ്ടിയെടുത്ത് ചെറുയാത്രകൾ നടത്താറുണ്ട്. കഴിഞ്ഞ ഡിസംബറിലെ ദുബായ് യാത്ര മറക്കാനാവില്ല. ഞാനും എലീനയും ഗണപതിയും കൂടിയാണ് പോയത്. ഷൂട്ടിങ് ആവശ്യത്തിനുള്ള യാത്രയായിരുന്നു അത്. ന്യൂ ഇയർ ആഘോഷം അവിടെയായിരുന്നു. അതൊരു കിടിലൻ യാത്രയായിരുന്നു. ദുബായിലെ മിക്ക പ്രധാന കാഴ്ചകളും അന്ന് ഞങ്ങൾ കണ്ടു. എലീന അന്ന് ഗർഭിണിയായിരുന്നു. ദുബായ് ആരെയും ആകർഷിക്കുന്ന നാടാണ്. മുമ്പും അവിടെ പോയിട്ടുണ്ടെങ്കിലും ഓരോ തവണ പോകുമ്പോഴും വല്ലാത്തൊരു ഫീലാണ് അവിടം സമ്മാനിക്കുന്നത്. രാത്രിയിൽ വേറൊരു ഭാവമാണ് നഗരത്തിന്. ഞങ്ങൾ രാത്രി മുഴുവൻ നഗരത്തിരക്കുകളിലൂടെ നടന്നു' ബാലു പറയുന്നു.

Recommended Video

Balu Varghese Exclusive Interview | FilmiBeat Malayalam

'അമേരിക്ക ബസിൽ ചുറ്റികറങ്ങി കാണാൻ അവസരം ലഭിച്ചതിനെ കുറിച്ചും ബാലു പറയുന്നു. വിദേശരാജ്യം കാണണമെന്ന ആഗ്രഹവുമായിരിക്കുമ്പോൾ ഒരിക്കൽ സ്റ്റേജ് ഷോയ്ക്ക് അവസരം ലഭിച്ചു. അമേരിക്ക കാണാം എന്ന ഒറ്റക്കാര്യത്തിന്റെ പുറത്താണ് ഞാൻ അന്ന് സ്റ്റേജ് ഷോയുടെ ഭാഗമായി പോയത്. സാധാരണ സംഘാടകർ അറേഞ്ച് ചെയ്ത് തരുന്ന വാഹനങ്ങളിലാണ് പോകുന്നത്. അന്ന് ഞങ്ങൾക്ക് ബസ് ആയിരുന്നു അവർ ഏർപ്പാടാക്കിയത്. അമേരിക്കയിൽ അങ്ങോട്ടുമിങ്ങോട്ടും ബസിൽ യാത്ര ചെയ്യാൻ കിട്ടിയ അവസരം മറക്കാനാവില്ല. കാഴ്ചകൾ കണ്ട് അങ്ങനെ ഇരിക്കാം. നമ്മൾ വിമാനത്തിലും മറ്റും യാത്ര ചെയ്യുമ്പോൾ കാണാൻ പറ്റാത്തത്ര കാഴ്ചകൾ ആ ബസ് യാത്രയിൽ കണ്ടു തീർക്കാം' യുവ താരം പറയുന്നു. കഴിയുന്നത്ര യാത്രകൾ നടത്തുക എന്നത് വലിയ ആ​ഗ്രഹമാണെന്നും യൂറോപ്പ് ട്രിപ്പാണ് തങ്ങളുടെ അടുത്ത സ്വപ്നമെന്നും ബാലു വർ​ഗീസ് പറയുന്നു. എല്ലാമൊന്ന് ശാന്തമായിട്ട് മകനൊപ്പം ഒരു യുറോപ്പ് ട്രിപ്പിനുള്ള പ്ലാനിങ്ങിലാണെന്നും ബാലു പറയുന്നു. ഇനി സുമേഷ് ആന്റ് രമേഷ് എന്ന ചിത്രമാണ് ബാലുവിന്റേതായി റിലീസിനെത്താനുള്ളത്. ഏറെ നാളുകളായി എല്ലാവരും പ്രതീക്ഷയോടെ കാത്തിരിക്കുന്ന സിനിമ കൂടിയാണ് അത്. സലീം കുമാർ അടക്കമുള്ള മുൻ നിര താരങ്ങളും ചിത്രത്തിന്റെ ഭാ​ഗമായിട്ടുണ്ട്.