കാമുകനെ വിവാഹം കഴിക്കാനൊരുങ്ങി ഹൃതിക്കിന്റെ ആദ്യ ഭാര്യ സൂസൻ; ഹൃതിക് രണ്ടാം വിവാഹത്തിനെന്ന വാർത്തകൾക്കിടെ

സൂസനും അർസ്ലനും തങ്ങളുടെ ഒരുമിച്ചുള്ള ചിത്രങ്ങൾ സോഷ്യൽ മീഡിയയിൽ പങ്കുവെക്കാറുണ്ട്. അടുത്തിടെയാണ് ഹൃതിക് റോഷനും സബയും തങ്ങളുടെ പ്രണയം പുറംലോകത്തെ അറിയിച്ചത്. കരൺ ജോഹറിന്റെ ബർത്ത് ഡേ പാർട്ടിക്ക് ഇരുവരും ഒരുമിച്ചായിരുന്നു എത്തിയത്. പാർട്ടിയിൽ തന്റെ കാമുകിയെന്ന് പറഞ്ഞ് ഹൃതിക് സബയെ എല്ലാവരെയും പരിചയപ്പെടുത്തുകയും ചെയ്തത്രെ.

ഇപ്പോഴിതാ ഹൃതികിന്റെ മുൻ ഭാര്യ സൂസനെ സംബന്ധിച്ച മറ്റൊരു വിവരമാണ് പുറത്തു വരുന്നത്. കാമുകൻ അർസ്ലൻ ​ഗോണിയുമായി വിവാഹ ജീവിതത്തിലേക്ക് കടക്കാനൊരുങ്ങുകയാണത്രെ സൂസൻ. താരങ്ങളുമായി ബന്ധപ്പെട്ട അടുത്ത വൃത്തങ്ങളാണ് ഇക്കാര്യം ബോളിവുഡ് ലൈഫിനോട് വെളിപ്പെടുത്തിയത്.

സൂസനും അർസ്ലനും വളരെ പക്വതയുള്ളവരാണ്. ജീവിതകാലം മുഴുവൻ ഒരുമിച്ച് ചെലവഴിക്കാൻ ആ​ഗ്രഹിക്കുന്നെന്നും വിവാഹമാണ് അവരുടെ മനസ്സിലെന്നും ബോധ്യമുണ്ട്. സൂസനും രണ്ടാം വിവാഹത്തെ പറ്റി ​ഗൗരവമായി ആലോചിക്കുന്നുണ്ട്. വിവാഹം കഴിക്കുകയാണെങ്കിൽ ​ഗംഭീരമായ ആഘോഷങ്ങൾ ഉണ്ടാവില്ല. ലളിതമായിട്ടായിരിക്കും വിവാഹമെന്നും ഈ വൃത്തങ്ങൾ പറയുന്നു.

ഹൃതികും സബയും വിവാഹത്തിനൊരുങ്ങുന്നു എന്ന റിപ്പോർട്ടുകൾക്കിടെയാണ് പുതിയ വാർത്തയും. 2000 ത്തിലാണ് സൂസനും ഹൃതികും വിവാഹിതരായത്. എന്നാൽ 2014 ഓടെ ബന്ധം വേർപിരിഞ്ഞു. പരാജയപ്പെട്ട ബന്ധത്തിൽ തുടരാൻ താൽപര്യമില്ലെന്നാണ് വിവാഹ മോചനത്തെ പറ്റി സൂസൻ ഒരിക്കൽ പറഞ്ഞത്.

'ജീവിതത്തിൽ ഒരുമിച്ച് നിൽക്കാത്തതാണ് നല്ലത് എന്ന ഘട്ടത്തിലേക്ക് ഞങ്ങളെത്തി. അത് മനസ്സിലാക്കുകയും പരാജയപ്പെട്ട ഒരു ബന്ധത്തിൽ തുടരാതിരിക്കേണ്ടതും പ്രധാനമായിരുന്നു,' 2017 ൽ സൂസൻ പറഞ്ഞതിങ്ങനെ. ഇരുവർക്കും ഹെഹ്രാൻ, ഹൃദാൻ എന്നീ രണ്ട് ആൺകുട്ടികളുമുണ്ട്.

വിവാഹ മോചിതരായ ശേഷവും ഹൃതികും സൂസനും പൊതുവേദിയിൽ ഒരിക്കലും പരസ്പരം കുറ്റപ്പെടുത്തിയിട്ടില്ല. നേരത്തെ നടി കങ്കണ റണൗത്തുമായി ബന്ധപ്പെട്ട് ഹൃതിക്കിനെതിരെ വന്ന വിവാദങ്ങളിലും നടനെ സൂസൻ പിന്തുണച്ചിരുന്നു. ഒരിടവേളയ്ക്ക് ശേഷം ഹൃതിക് റോഷനെ ബി​ഗ് സ്ക്രീനിൽ കാണാനുള്ള കാത്തിരിപ്പിലാണ് ആരാധകർ. ഫൈറ്റർ ആണ് ഹൃതിക്കിന്റെ പുറത്തിറങ്ങാനുള്ള സിനിമ. സിനിമയുടെ ചിത്രീകരണം പൂർത്തിയായിട്ടില്ല. ദീപിക പദുകോണും അനിൽ കപൂറുമാണ് ചിത്രത്തിലെ മറ്റ് പ്രധാന കഥാപാത്രങ്ങൾ.