ലാലേട്ടന്‍ തന്ന ഓണക്കോടി. തൊട്ടടുത്ത് നിര്‍ത്തി ചേര്‍ത്തുപിടിച്ച് നല്‍കിയ സമ്മാനത്തെ കുറിച്ച് അഡോണി

അഡോണിയുടെ വാക്കുകളിലേക്ക്: 'നിനക്കത് ഉടുത്തിട്ട് ഫോട്ടോ എടുക്കത്തില്ലേ? കൈയില്‍ പിടിച്ചാണോ എടുക്കുന്നെ?, ഇല്ലമ്മേ, ഇതിങ്ങനെ കൈയില്‍ പിടിച്ച് കൊതിതീര്‍ന്നില്ല. ലാലേട്ടന്‍ തന്ന ഓണക്കോടി അല്ലെ.! അതെ, ആ മനുഷ്യന്‍ തൊട്ടടുത്ത് നിര്‍ത്തി ചേര്‍ത്തുപിടിച്ച് നിറഞ്ഞ മനസ്സോടെ തന്ന ഓണസമ്മാനം. ആരെങ്കിലും ഒരോണക്കോടി തന്നിരുന്നെങ്കിലെന്ന് കൊതിച്ച ഒരു കാലമുണ്ടായിരുന്നില്ലേ?.

പുതിയ കുപ്പായമിട്ട് ചുറ്റും ആഘോഷത്തിന്റെ ആര്‍ത്തിരമ്പലുകള്‍ കേള്‍ക്കുമ്പോള്‍ ഹോസ്റ്റലില്‍ കൂട്ടുകാരുടെ ഷെല്‍ഫിന്റെ അരികില്‍ തപ്പിനോക്കിയ ഒരു കാലമുണ്ടായിരുന്നില്ലേ?. പഴയ മുണ്ട് ഒന്നൂടെ ഇരട്ടി കഞ്ഞിപ്പശ മുക്കിയെടുത്ത് ക്യാമ്പസ്സിലേക്ക് പോയ കാലമുണ്ടായിരുന്നില്ലേ?. ഡിപ്പാര്‍ട്ട്‌മെന്റ് ഓണാഘോഷത്തിന് ഒരേ നിറത്തിലെ കുപ്പായം മേടിക്കാന്‍ പൈസ ഉണ്ടാക്കാന്‍ തലേ ആഴ്ച്ചയില്‍ ഓടിയ ഓട്ടമില്ലേ?.

പല വര്‍ണ്ണങ്ങളില്‍ നിറഞ്ഞുനിന്ന കുപ്പായക്കടകളിലേക്ക് നോട്ടമെത്താതിരിക്കാന്‍ മനപ്പൂര്‍വ്വം മുഖം തിരിച്ചുപിടിച്ചു നടന്നൊരു കാലമുണ്ടായിരുന്നില്ലേ?. ഇന്ന്...എനിക്കും ഒരോണക്കോടി കിട്ടി. മോഹന്‍ലാല്‍ എന്ന മനുഷ്യന്‍ തന്നതാണ്. ആഗ്രഹങ്ങളുടെ പരകോടിയിലേക്ക് കയറ്റിവിട്ടിട്ട് കാലം തന്നതാണ്. ഓണമാണ്. ഒരു തിരിച്ചുവരവിന്റെ ഓര്‍മ്മയാണ്. അപമാനത്തിന്റെ പാതാളത്തിലേക്ക് എത്രയേറെ ആഴത്തില്‍ ആണ്ടുപോയാലും തിരിച്ചുവരവിന്റെ ഒരു കാലമുണ്ടാകുമെന്ന് ഓര്‍പ്പിക്കുന്ന ഓണം, അഡോണി പറയുന്നു.

കളിയാക്കിയവരുടെയും, തള്ളിപ്പറഞ്ഞവരുടെയും, ഒഴിവാക്കിയവരുടെയും, അവഗണിച്ചവരുടെയും പരിഹസിച്ചവരുടെയും മുന്‍പില്‍ കാലം നിങ്ങളെ ഉയര്‍ത്തുന്നൊരു കാലം വരും. അന്ന് നിങ്ങള്‍ സ്വപ്നം കണ്ടതിനേക്കാള്‍ അപ്പുറമുള്ള കുപ്പായങ്ങള്‍ നിറമണിയും, അഡോണി കുറിച്ചു. അതേസമയം ബിഗ് ബോസ് സമയത്ത് അഡോണിയ്ക്കും പിന്തുണയുമായി ഫാന്‍സ് ഗ്രൂപ്പുകള്‍ സോഷ്യല്‍ മീഡിയയില്‍ ഉണ്ടായിരുന്നു.

Recommended Video

mammootty and mohanlal attend a wedding ceremony at sharjah

ബിഗ് ബോസില്‍ നിന്നും പുറത്തായ ശേഷം ലൈവ് വീഡിയോകളിലൂടെ പ്രേക്ഷകര്‍ക്ക് നന്ദി പറഞ്ഞ് താരം എത്തി. തുടക്കത്തില്‍ തന്നെ പുറത്താവുമെന്ന് പലരും കരുതിയ മല്‍സരാര്‍ത്ഥി ആയിരുന്നു അഡോണി. എന്നാല്‍ മികച്ച ഗെയിം പുറത്തെടുത്ത് ബിഗ് ബോസില്‍ മുന്നേറാന്‍ താരത്തിന് സാധിച്ചു. മുണ്ടക്കയം സ്വദേശിയായ അഡോണി സെലിബ്രിറ്റി സ്റ്റാറ്റസുകളില്ലാതെയാണ് ബിഗ് ബോസില്‍ എത്തിയത്. മൂന്നാം സീസണില്‍ ഫൈനല്‍ സാധ്യതകളുണ്ടെന്ന് പലരും പ്രവചിച്ച മല്‍സരാര്‍ത്ഥി കൂടിയായിരുന്നു അഡോണി. എന്നാല്‍ വോട്ട് കുറഞ്ഞത് താരത്തിന് തിരിച്ചടിയായി മാറി.